Дэвід Крэмер: Саміт «Усходняга партнёрства» - без ўладаў Беларусі

(абноўлена) Кіраўнік Freedom House заклікае не запрашаць прадстаўнікоў рэжыму Лукашэнкі на саміт у Вільні.

«Я не лічу, што там павінны быць прадстаўнікі беларускіх уладаў, калі захаваецца цяперашняя сітуацыя. Мне б куды больш хацелася, каб Беларусь прадстаўлялі актывісты грамадзянскай супольнасці, праваабаронцы», - сказаў Дэвід Крэмер на дыскусіі, якая прайшла ў амбасадзе ЗША ў Літве ў сераду ўвечары, перадае «Інтэрфакс».

«Я не кажу «ніколі не размаўляйце з урадам», гэта нерэальна. Але не варта было б даваць людзям з урада такую платформу, як «Усходняе партнёрства», - сказаў ён.

Падчас дыскусіі Дэвід Крэмер сказаў, што ў 2006 годзе, калі ён яшчэ працаваў у Дзярждэпартаменце ЗША, у Вашынгтоне памыліліся, спрабуючы аб'яднаць беларускую апазіцыю.

«Я не лічу, што справа Захаду - Еўропы і ЗША - гвалтоўна аб'ядноўваць апазіцыю. Думаю, што гэта не спрацуе.

Мы спрабавалі зрабіць гэта ў 2006 годзе. Я сам у гэтым удзельнічаў, і я думаю, што мы памыляліся», - сказаў Крэмер.

Кіраўнік Freedom House падкрэсліў, што Захад не мае права вырашаць, хто будзе лідэрам апазіцыі, які павінен пераняць уладу, але сказаў, што Еўропе і Амерыцы трэба больш актыўна тлумачыць, што з сыходам Лукашэнкі ўмовы жыцця ў Беларусі стануць лепш.

«Мы на Захадзе павінны паказаць, што стане магчымым пасля Лукашэнкі - калі адчыняцца дзверы, калі казаць аб лібералізацыі віз, дапамогі, фінансаванні з Міжнароднага валютнага фонду або росце гандлю», - сказаў ён.

Беларусь уваходзіць у лік шасці суседзяў Еўрапейскага Звяза, якія ўключаныя ў праграму «Усходняе партнёрства». ЕЗ і ЗША ўвялі санкцыі ў дачыненні да прадстаўнікоў беларускага ўраду, абвінавачваючы яго ў рэпрэсіях супраць апазіцыі і абмежаваннях правоў чалавека.

Саміт ЕЗ і «Усходняга партнёрства» павінен праходзіць у лістападзе гэтага года ў Вільні. Літоўскія прадстаўнікі спадзяюцца, што на яго прыедуць і кіраўнікі буйных краін Еўразвяза.