Лукашэнку падказалі новы спосаб шантажу Захаду

Jamestown Foundation распавёў пра мэты візіту амерыканскіх палітолагаў у Беларусь.

Як адзначаецца ў паведамленні, размешчаным на сайце фонду, у ходзе сустрэч яны атрымалі інфармацыю ў тым ліку пра ролю Беларусі ў Паўночнай размеркавальнай сетцы (Northern Distribution Network), якая выкарыстоўваецца для забеспячэння войскаў ЗША і NATO у Афганістане, піша БелаПАН.

«Маршрут праходзіць з літоўскага порта Клайпеда праз Беларусь і далей у Афганістан, - адзначаецца ў ім. - У мінулым годзе аб'ём грузаў, якія ішлі транзітам праз Беларусь, падвоіўся. Чакаецца таксама, што Беларусь будзе адыгрываць тут усё большую ролю, калі ЗША і NATO будуць пакідаць Афганістан у 2014 годзе».

У паведамленні падкрэсліваецца, што Беларусь узаемадзейнічае са ЗША і NATO, у той час як у дачыненні да краіны дзейнічаюць санкцыі Захаду. Фактычна, беларускаму дыктатару простым тэкстам распавялі, як яшчэ ён можа шантажаваць Захад. Так гэтую інфармацыю пракаментаваў сайту charter97.org першы кіраўнік незалежнай Беларусі Станіслаў Шушкевіч.

«Цяпер для Лукашэнкі важныя ўсялякія вагары, якія дапамогуць змякчыць санкцыі. Для гэтага ён будзе выкарыстоўваць усе магчымыя спосабы, у тым ліку і шантаж заходніх краін. Я не разумею, чаму гэтаму спрыяюць прадстаўнікі Jamestown Foundation пры тым, што гэтыя дзеянні ідуць насуперак з палітыкай ЗША. Нагадаю, што дзярждэпартамент, сэнат і кангрэс гэтай краіны стала называюць рэжым Лукашэнкі дыктатурай і патрабуюць спынення рэпрэсій», - заявіў ён.

Палітык сумняваецца, што Захад паддасца на шантаж афіцыйнага Менска.

«Транспарціроўка грузаў не стане тымі «30 срэбранікамі», за якія ЗША здолее прадаць лёс беларускіх палітвязняў. Трэба разумець, што ўсялякае супрацоўніцтва з Захадам, у тым ліку і транспарціроўку грузаў, Лукашэнка выкарыстоўвае ў сваіх інтарэсах, і яно не можа быць прычынай змякчэння адносін дэмакратычных краін да таго, што адбываецца ў Беларусі», - заявіў Станіслаў Шушкевіч.

Нагадаем, кіраўнік Jamestown Foundation Глен Ховард, аналітыкі фонду Уладзімір Сокар, Грыгорый Іофэ і Януш Бугайскі наведалі Беларусь на мінулым тыдні. 21 студзеня яны сустрэліся з Лукашэнкам. Акрамя таго, у іх адбыліся сустрэчы з міністрам замежных спраў Уладзімірам Макеем, прадстаўнікамі Мінабароны, Беларускай чыгункі, акрэдытаванымі ў Менску еўрапейскімі дыпламатамі і прадстаўнікамі польскай дыяспары.

Jamestown Foundation заснаваны ў 1984 годзе і з'яўляецца незалежнай, няўрадавай арганізацыяй, якая займаецца палітычнымі і стратэгічнымі даследаваннямі сітуацыі ў Кітаі, Расеі, Еўразіі, а таксама сусветнага тэрарызму. Фонд выпускае тры перыядычныя выданні Eurasia Daily Monitor, Terrorism Monitor і China Brief.