У Горках сям'я правалілася пад плітку, выкладзеную перад «Дажынкамі»

Аўральныя тэмпы падрыхтоўкі Горак да «Дажынак-2012» адбіліся на якасці будаўнічых работ.

Не паспеў горад адысці ад свята, як інтэрнэт ужо абляцелі фатаграфіі зацвілых сцен у новым інтэрнаце сельгасакадэміі і падтопленага дажджавой вадой моладзевага цэнтра ў амфітэатры. І вось новы, яшчэ больш страшны факт: у самым цэнтры горада, у некалькіх дзесятках метраў ад райвыканкама, два чалавекі праваліліся пад тратуарную плітку, выкладзеную да «Дажынак». Здарылася гэта каля дома №5 на вуліцы Якубоўскага 4 студзеня, каля 18:00. З рэдакцыяй onliner.by звязаўся ўдзельнік гэтага надзвычайнага здарэння Павел і расказаў, як усё адбылося.

«У той вечар мы з жонкай сустрэліся на прыпынку каля аўтастанцыі і накіраваліся ў краму, - успамінае Павел. - Ішлі, трымаючыся за рукі, пра нешта размаўлялі. І раптам Алеся правалілася пад зямлю. Пару секунд - і пад маімі нагамі нешта храбусціць, ламаецца, і я таксама пачынаю падаць уніз. Кажуць, жыццё за секунду перад вачыма можа прабегчы - так яно і здарылася ў мяне ў той момант, настолькі раптоўна ўсё адбылося».

Пры абвальванні тратуарнай пліткі дзяўчына не выстаяла на нагах і, упаўшы, практычна знікла ў яме. Малады чалавек праваліўся па пояс. Трымаючы жонку за руку, ён дапамог ёй выбрацца. Прыйшоўшы ў сябе, Павел выклікаў хуткую дапамогу, міліцыю і ратавальнікаў.

«Хвілін 20 Алеся не магла нічога казаць, перажывала шок. Лекары зрабілі ёй заспакаяльны ўкол, - распавядае Павел. - Бачных пашкоджанняў ні ў яе, ні ў мяне не выявілі. А калі б замест нас у тую хвіліну па плітцы ішла бабулька або беглі б дзеці?»

Павел зрабіў некалькі фотаздымкаў правалу.

«Пры нас міліцыя замерыла глыбіню - 1,2 метра. Пазней на месца прыехала брыгада камунальнікаў і хтосьці з райвыканкама. Спачатку чыноўнікі круціліся вакол ямы і толькі потым падышлі да нас і пацікавіліся самаадчуваннем... »

Аднаўленчыя работы працягваліся глыбокай ноччу.

У раёне абвальвання пліткі размешчаныя тры каналізацыйных люка. Магчыма, напярэдадні здарыўся прарыў, і вада падмыла грунт.

«Колькі жыву, на маёй памяці такога ў Горках не здаралася. Каб у цэнтры горада, каля райвыканкама, - кажа Павел. - Грошы на рамонт і добраўпарадкаванне да свята вылучаліся немалыя. Так, напэўна, можна было ўсё прадугледзець, зрабіць працу не спехам, а на сумленне».