Мазырскі НПЗ і «Гарызонт» выставілі на продаж

Дзяржаўны камітэт па маёмасці абвясціў пра распродаж найбуйнейшых прадпрыемстваў краіны.

Іх спіс апублікаваны на сайце ведамства.

На аўкцыёнах і па конкурсе плануецца прадаць акцыі больш 80 прадпрыемстваў, якія належаць дзяржаве, і яшчэ некалькіх прадпрыемстваў як маёмасных комплексаў. Рашэнне аб гэтым, як падкрэсліваецца ў паведамленні, прыняў Лукашэнка.

У пералік акцыянерных таварыстваў уваходзяць прадпрыемствы канцэрнаў «Белнафтахім», «Беллеспаперапрам», «Белдзяржхарчпрам», Мінбудархітэктуры, Мінпрама, Мінсельгасхарча, Мінтранса, Мінсувязі, Мінэнерга. Практычна ва ўсіх гэтых прадпрыемствах дзяржава гатовая прадаць увесь свой пакет.

Да продажу на аўкцыёнах прапануюцца акцыі ААТ «Гомельскі завод вымяральных прыбораў» (99,86% акцый), ААТ «Магілёўдрэў» (96,44%), ААТ «Рэчыцадрэў» (99,6%), СЗАТ «Шклозавод Ялізава » (35%), ААТ «Віцебскі прыборабудаўнічы завод» (60,9%), ААТ «Брэсцкі радыётэхнічны завод» (86,16%), ААТ «Івацэвічыдрэў» (42,22%), ААТ «Віцебскі плодаагароднінны камбінат» (99,96%).

Па конкурсе прадаюцца акцыі 33 прадпрыемстваў, у тым ліку ААТ «Мазырскі НПЗ» (42,76%), ААТ «Кіруючая кампанія холдынгу «Гарызонт» (99,88%), ААТ «Авіякампанія «Трансавіяэкспарт» (99,89%), ААТ «БАТЭ - кіруючая кампанія холдынгу «Аўтакампаненты» (25%), ААТ «Менскі завод ацяпляльнага абсталявання» (25,83%).

«Асоба, зацікаўленая ў куплі акцый акцыянерных (гаспадарчых) таварыстваў і прадпрыемстваў як маёмасных комплексаў, якія належаць Рэспубліцы Беларусь, накіроўвае ў Дзяржаўны камітэт па маёмасці заяву па форме. Заявы патэнцыйных інвестараў (пакупнікоў) аб зацікаўленасці ў куплі акцый (долей) акцыянерных (гаспадарчых) таварыстваў і прадпрыемстваў як маёмасных комплексаў, якія належаць Рэспубліцы Беларусь, неабходна накіроўваць на адрас Дзяржкаммаёмасці па пошце», гаворыцца ў паведамленні.

Заявы будуць разглядацца камісіяй па разглядзе заяў патэнцыйных пакупнікоў аб зацікаўленасці ў куплі акцый таварыстваў і прадпрыемстваў як маёмасных комплексаў і па выніках разгляду гэтых заяў камісіяй рыхтуюцца прапановы аб мэтазгоднасці падрыхтоўкі праектаў адпаведных рашэнняў Лукашэнкі.

Пра вялікі распродаж нядаўна казаў кіраўнік Дзяржкамітэта па маёмасці Беларусі Георгій Кузняцоў. Ён заявіў, што ў цяперашні час рыхтуюцца прапановы па продажы 90 сярэдніх па велічыні прадпрыемстваў дзяржуласнасці на агульную суму 600 млн даляраў.

«Мы распрацоўваем ўмовы і спосабы іх продажу па конкурсу або аўкцыёну. У бліжэйшы час прадставім гэтыя прадпрыемствы ў адкрытым доступе на сайце Дзяржкаммаёмасці, будзем іх прапаноўваць да продажу, вывучаць попыт. Калі да іх будзе цікавасць, з'явяцца жадаючыя іх купіць і ў Дзяржкаммаёмасць паступіць заява ад патэнцыйнага пакупніка аб гатоўнасці набыць прапанаваны аб'ект прыватызацыі, будзем рыхтаваць адпаведны праект рашэння кіраўніка дзяржавы, каб правесці конкурс ці аўкцыён», - заявіў раёну кіраўнік Дзяржкаммаёмасці.

Нагадаем, яшчэ ў лістападзе мінулага года Лукашэнка заявіў, што не будзе прадаваць так званае «фамільнае срэбра», так як «нельга жыць за тое, каб прадаваць нацыянальны здабытак».