The Financial Times: Крымінальная справа дапаможа вярнуць Баўмгертнера ў Расею

«Калійная вайна» паміж Расеяй і Беларуссю набыла нечаканы паварот у панядзелак.

Тады расейская паліцыя распачала крымінальную справу ў дачыненні да фінансавай дзейнасці гендырэктара расейскай групы «Уралкалій» Уладзіслава Баўмгертнера, што можа прывесці да яго экстрадыцыі ў Расею, піша The Financial Times.

Баўмгертнер знаходзіцца ў Менску пад хатнім арыштам, які рушыў услед за распадам картэльнага пагаднення паміж «Уралкаліем» і «Беларуськаліем», нагадвае аўтар артыкула Чарльз Кловер.

Маючы на мэце змяніць умовы здзелкі паміж дзвюма кампаніямі, якія дзейнічалі з 2010 па 2013 год, Аляксандр Лукашэнка паспрабаваў аказаць ціск на найбуйнейшага акцыянера «Уралкалію» Сулеймана Керымава, з тым каб ён прадаў 22% акцый, гаворыцца ў артыкуле.

Аўтар спасылаецца на дадзеныя, атрыманыя ад знаёмых з сітуацыяй крыніц, паводле якіх некаторыя акцыянеры «Уралкалію» настойвалі на тым, што вызваленне Баўмгертнера павінна быць папярэдняй умовай любых перамоў і продажу пакета Керымава.

«На думку аналітыкаў, незразумела, збіраецца расейскі Следчы камітэт падтрымаць абвінавачванні супраць Баўмгертнера або ўзбуджэнне гэтай справы - мера, якая дазваляе вярнуць яго ў Расею і прапанаваць Лукашэнку спосаб выйсці з крызісу, захаваўшы твар», - перадае Кловер.

«Наколькі вядома, Керымаў вядзе перамовы аб продажы свайго пакета акцый з дзвюма фінансавымі групамі: адна - на чале з мільярдэрам Міхаілам Прохаравым - зацікаўленая ў набыцці за палову долі Керымава, другая - пад кіраўніцтвам банкіра Уладзіміра Когана - хацела б набыць ўсю долю», - паведамляе Чарльз Кловер.

Пераклад: Inopressa.ru

Фота: ІТАР-ТАСС