Выкладчыкам з філіяла БНТУ паўгода не плацяць заробак

Выкладчыкам філіяла БНТУ з Маладзечна за паўгода так ні разу і не выплацілі заработную плату.

У рэдакцыю onliner.by звярнуўся за дапамогай калектыў выкладчыкаў кафедры «Інфармацыйныя сістэмы і тэхналогіі» Міжнароднага інстытута дыстанцыйнай адукацыі (філіяла БНТУ) з Маладзечна. Ім за паўгода так ні разу і не выплацілі заработную плату. Уся праблема ў тым, што шэсць месяцаў былы загадчык кафедры не падаваў дакументы на аплату іх працы, новы дырэктар нічога пра гэта не ведае, а ў дэканаце ў Менску не даюць ніяк адказаў на іх лісты. «Нас паўгода водзяць за нос!» - скардзяцца яны.

Вось што распавялі выкладчыкі: «Былы загадчык кафедры звольніўся, не закрыўшы нам па грамадзянска-прававых актах дамовы, і нам не заплацілі грошы. Усяго без заработнай платы за паўгода засталіся 12 выкладчыкаў. Сумы ва ўсіх розныя, так як нагрузка была ва ўсіх розная. Хтосьці працаваў па сумяшчальніцтве - ім грошы выплацілі на асноўнай працы, а вось пагадзінную працу нікому не аплацілі. У кагосьці 150 гадзін, у кагосьці 40 і 60, у рублях гэта максімум 5 млн. Новы дырэктар сказала, што нічога не ведае і што ёй нічога не перадавалі з гэтай нагоды. У дэканаце, пасля таго як мы месяц назад напісалі калектыўны запыт з просьбай тэрмінова выплаціць выкладчыкам заработную плату за фактычна адпрацаваны час са студзеня па чэрвень 2013 года, нам нічога да гэтага часу не адказалі. Старога дырэктара мы ўсяляк спрабуем вылавіць і вытэлефанаваць, але ён хаваецца ад нас. Падчас працы ён нам пастаянна абяцаў, што вось-вось закрые гэтыя пытанні, а калі звольніўся, то сказаў: «Я звольнены, нічога не ведаю, і да мяне не павінна быць ніякіх пытанняў». Мы не ведаем, дзе шукаць праўду ў гэтай сітуацыі».

У былога в.а. загадчыка кафедры Змітра Бараноўскага з нагоды гэтага становішча ёсць свае апраўданні і аргументы. І ў гэтай сітуацыі, на яго думку, вінаватыя самі выкладчыкі, так як не яны падавалі інфармацыю аб адпрацаваных гадзінах своечасова: «З нагоды налічэння заработнай платы выкладчыкам я атрымаў вусную адмову ў дэканаце. Дэкан мне паведаміў, што аплата па актах «пагадзінкі» праведзеная не будзе. Вось і ўсё. Аргументацыя была такой, што нібыта нагрузка была пададзена не своечасова. А гэта звязана з тым, што інфармацыю ад выкладчыкаў я атрымліваў не своечасова і са спазненнем. Зараз я нічога не магу зрабіць».

Ва ўніверсітэце былі здзіўленыя, што выкладчыкі сталі скардзіцца. Бо ніякай праблемы з выплатай не было б, калі б яны своечасова падавалі акты. Сёння ім гатовыя ўсё выплаціць, але пры ўмове, што яны самі адновяць ўсе неабходныя дакументы.

«З гэтымі выкладчыкамі была заключаная дамова падраду. І згодна з ёй аплата працы ажыццяўляецца пасля прадастаўлення акта выкананых работ і запісу ў часопісе выкананых нагрузак, дзе зарэгістравана, што яны зрабілі. На жаль, гэтыя выкладчыкі не далі нам такіх дакументаў. І, магчыма, у гэтым ёсць доля віны былога кіраўніка кафедры, якому неаднаразова нагадвалася, што дакументы трэба падаць. Але іх не было, таму мы змянілі кіраўніка, - пракаментаваў сітуацыю дырэктар Міжнароднага інстытута дыстанцыйнай адукацыі Ігар Cацікаў. - Выкладчыкам мы прапануем аднавіць дакументы, а то яны чакаюць, што гэта за іх хтосьці павінен зрабіць. Мы гатовыя ўсё аплаціць, але толькі калі ў нас будуць аформленыя ўсе дакументы. Як мы можам заплаціць, калі няма ніякіх ведамасцяў?»