Лукашэнка: На Палац Незалежнасці не выдаткаваў ніводнага бюджэтнага рубля

Беларускі кіраўнік сцвярджае, што ў яго новую рэзідэнцыю не ўкладзена ніводнага рубля бюджэтных сродкаў.

Пра гэта ён заявіў сёння, выступаючы на калоквіўме са студэнтамі Магілёўскага дзяржаўнага ўніверсітэта імя А. А. Куляшова, перадае БелТА.

«Сёння часта крытыкуюць за Палац Незалежнасці. Але паглядзіце на гэты цэнтр - Плошча сцяга, адноўлены «Белэкспа», дзе мы выстаўляем вышэйшыя дасягненні нашага народа, і Палац Незалежнасці, - сказаў ён. - Яны нават не ведаюць, колькі гэта каштуе, за якія грошы пабудавана. Там няма ніводнага бюджэтнага рубля. І што? Дрэнна, што гэта пабудавана? Гэта сімвал, і для краіны, як і для любога чалавека, гэта вельмі важна. Асабліва цяпер, калі мы хочам прэзентаваць сябе».

Лукашэнка адзначыў, што Палац Незалежнасці будзе адкрыты для людзей. «Гэта не рэзідэнцыя прэзідэнта. Там, праўда, ёсць адзін рабочы кабінет для прэзідэнта, больш там кабінетаў няма», - сказаў ён. Лукашэнка адзначыў, што ў палацы будуць выстаўляцца і яго падарункі, карціны, якія ён прывёз з тых краін, якія ён наведваў. «Але гэтым цэнтрам мы падкрэслілі тое, што мы стварылі сваю дзяржаву», - сказаў Лукашэнка.

Кіраўнік адзначыў, што хацеў бы, каб у палацы праходзілі важныя і знакавыя для краіны мерапрыемствы, напрыклад сустрэчы дэлегацый замежных дзяржаў, ушанаванне шматдзетных бацькоў, прыём у піянеры дзяцей з усёй рэспублікі.

Ён звярнуў увагу на тое, што ўсё ў Палацы Незалежнасці зроблена з айчынных матэрыялаў і самімі беларусамі. «Ён дэманструе, на што здольныя нашы людзі. Вось усе кажуць, што шмат хто з'язджае на заробкі. Але мы ж не закрыем іх тут, у нас не турма, а адкрытая краіна. Вось тыя, якія, так бы мовіць, засталіся, зрабілі такое хараство. І мы будзем гэта паказваць», - сказаў Аляксандр Лукашэнка.

Нагадаем, у жніўні стала вядома, што новую рэзідэнцыю Лукашэнкі будавалі рабочыя з Паўночнай Карэі.

Фота: Андрэй Дрозд