Крэмль пацвердзіў візіт Пуціна ў Менск

Прэзідэнт Расеі 24-25 кастрычніка ў Менску возьме ўдзел у чарговых пасяджэннях Вышэйшага Еўразійскага эканамічнага савета і Савета кіраўнікоў дзяржаў СНД.

Пра гэта паведамляе прэс-служба Крамля.

На пасяджэнні ВЕЭС прэзідэнты Расеі, Беларусі і Казахстана разгледзяць асноўныя напрамкі развіцця інтэграцыі на еўразійскай прасторы.

Мяркуецца абмен думкамі па пытаннях фарміравання да 1 студзеня 2015 года Еўразійскага эканамічнага саюза (ЕАЭС), уключаючы ход працы над праектам дамовы аб ЕАЭС.

Запланаванае падпісанне шэрагу сумесных дакументаў у сферы гандлю, канкурэнцыі, арганізацыі дзейнасці Еўразійскай эканамічнай камісіі.

Падчас сустрэчы Савета кіраўнікоў дзяржаў СНД плануецца абмеркаваць перспектывы пашырэння гандлёва-эканамічнага ўзаемадзеяння, супрацоўніцтва ў праваахоўнай сферы і развіццё культурна-гуманітарных сувязяў, у прыватнасці, падрыхтоўку да святкавання 70-й гадавіны Перамогі ў Вялікай Айчыннай вайне 1941-1945 гг. і абвяшчэнне 2014 года Годам турызму ў СНД.

Фота: РІА Новости