Рассельгаснагляд можа забараніць увоз бульбы з Беларусі

Федэральная служба па ветэрынарным і фітасанітарным наглядзе РФ выявіла беларускую бульбу, якая змяшчае каранцінны шкодны арганізм.

У ходзе праверак, праведзеных Рассельгаснаглядам у Маскве, Маскоўскай і Тульскай абласцях, была выяўленая беларуская бульба, якая змяшчае каранцінны шкодны арганізм, што багата забаронай на ўвоз беларускай бульбы ў РФ.

«У чатырох партыях харчовай бульбы агульнай вагой 77 тон, якая паступіла з Беларусі, выяўлены каранцінны шкодны арганізм - залацістая бульбяная нематода (Globodera rostochiensis)», - гаворыцца ў паведамленні ведамства.

«Заражаная прадукцыя суправаджалася фітасанітарнымі сертыфікатамі, выдадзенымі Галоўнай дзяржаўнай інспекцыяй па насенняводству, каранціну і ахове раслін Беларусі, якія гарантавалі адпаведнасць прадукцыі каранцінным фітасанітарным патрабаванням Расеі», - падкрэсліваецца ў паведамленні.

У гэтай сувязі Рассельгаснагляд звярнуўся ў Галоўную дзяржаўную інспекцыю па насенняводству, каранціну і ахове раслін Беларусі з просьбай правядзення ў магчыма кароткі тэрмін «кансультацый для пошуку шляхоў вырашэння наяўных праблем у галіне забеспячэння фітасанітарнай бяспекі грузаў расліннага паходжання, якія прыбываюць з Беларусі».

Трапленне залацістай бульбяной нематоды ў глебу (з клубнямі, ачысткамі, змывамі) прыводзіць да ўстойлівага заражэння, што выключае магчымасць вырошчвання на дадзеным участку раслін сямейства пасленавых на працягу доўгага часу (не менш за 7 гадоў).