Беларускі астраном-аматар адкрыў новую камету
3- 11.11.2013, 10:32
- 11,455
Адкрыццё афіцыйна прызнаў Цэнтр малых планет Міжнароднага астранамічнага саюза.
Астраном Генадзь Барысаў, супрацоўнік Крымскай станцыі астранамічнага інстытута імя Штэрнберга МДУ (ГАІШ), і Віталь Неўскі, беларускі астраном-аматар, 6 лістапада адкрылі дзве каметы - у пятніцу гэтыя адкрыцці афіцыйна прызнаў Цэнтр малых планет Міжнароднага астранамічнага саюза, піша РІА «Новости».
«Цяпер камета называецца C/2013 V2 (BORISOV). Цяжка казаць пра яе арбіту, але пакуль стаіць: C», гэта значыць, што камета неперыядычная. Ну а праз год-паўтара, калі ўсе дадзеныя будуць удакладненыя, можна будзе казаць пра яе перыяд або яго адсутнасць», - сказаў Барысаў.
У цяперашні час камета знаходзіцца ў раёне пояса астэроідаў. На працягу года яе яркасць павялічыцца, але не моцна, і няўзброеным вокам яна будзе не бачная, растлумачыў ён.
Адначасова з Барысавым астраном з Беларусі Віталь Неўскі адкрыў камету C/2013 V3 (NEVSKI) у ходзе назіранняў на абсерваторыі ў раёне Кіславодска, якая ўваходзіць у міжнародную сетку абсерваторый ISON. Барысаў адзначыў, што абедзве каметы былі адкрытыя пры дапамозе зробленых ім тэлескопаў.
«Гэта дзіўнае супадзенне, што дзве каметы былі адкрытыя менавіта на тэлескопах, якія я рабіў. Два аднолькавых тэлескопа і вось «стрэлілі» адначасова. Цяпер мы з ім (Неўскім) знаходзімся ў табліцы камет побач», - сказаў ён.
У 2012 годзе Віталём Неўскім з яго расейскім калегам Арцёмам Навічонкам на абсерваторыі ў раёне Кіславодска, якая ўваходзіць у сетку ISON была адкрытая камета C/2012 S1 (ISON). Камета ў лістападзе 2013 года пройдзе на адлегласці ў 0,012 астранамічнай адзінкі (сярэдняга радыусу зямной арбіты) ад Сонца. У снежні камета, адкрытая беларусам, пройдзе на мінімальнай адлегласці ад Зямлі - каля 0,4 радыусу зямной арбіты. На думку аўтараў адкрыцця, ISON, магчыма, стане Вялікай каметай 2013 года, а таксама самай яркай каметай першай паловы XXI стагоддзя.
Віталь Неўскі з Віцебска пабудаваў сваю дачную абсерваторыю звыш 20 гадоў таму. Увесь гэты час палюе за новымі каметамі. У агульнай колькасці 500 гадзін назіранняў увянчаліся поспехам у 2009 годзе. У яго ўпершыню ў гісторыі беларускай астраноміі атрымалася адкрыць астэроід ў сузор'і Дзевы ў 300 мільёнах кіламетраў ад Зямлі.