Камісар Рады Еўропы: Лондан не павінен фінансаваць беларускую дыктатуру

Нілс Мужніекс заклікаў урад Вялікабрытаніі спыніць фінансаванне афіцыйнага Менску.

Латвійскі палітык, былы міністр і кіраўнік Еўрапейскай камісіі ў барацьбе з расізмам і нецярпімасцю, які з мінулага года займае пасаду камісара Рады Еўропы ў правах чалавека, заявіў, што грашовая дапамога беларускім уладам недапушчальная да таго часу, пакуль у нашай краіне выкарыстоўваецца смяротнае пакаранне і ёсць палітвязні, піша брытанскае выданне The Telegraph (пераклад - charter97.org).

«Мы часта гатовыя закрываць вочы на тое, якім чынам краіны за межамі ЕЗ праводзяць брудную працу, спрабуючы абмежаваць міграцыйныя патокі, - сказаў Нілс Мужніекс. - Нам трэба быць вельмі асцярожнымі, даючы грошы дыктатарам».

Джым Мэрфі, міністр абароны ценявога кабінета Вялікабрытаніі, таксама заклікаў урад сваёй краіны адмовіцца ад фінансавай падтрымкі, якая аказваецца афіцыйнаму Менску ў рамках еўрапейскіх праграм. Ён сказаў, што заява Нілса Мужніекса выклікала ўзнікненне «новых страхаў, што брытанская дапамога траціцца такім чынам, які супярэчыць каштоўнасцям і нацыянальным інтарэсам» Вялікабрытаніі.

Нагадаем, нядаўна стала вядома аб тым, што грашовая дапамога з ЕЗ ідзе на ўтрыманне рэпрэсіўнага апарата апошняй дыктатуры Еўропы.

Сродкі, прызначаныя для аказання дапамогі тым, што жывуць у нястачы, былі выдаткаваныя на закупку абсталявання і забеспячэнне падрыхтоўкі сіл бяспекі і памежнікаў. Дапамога беларускім уладам аказваецца ў рамках праграмы Еўрапейскага Звяза EuropeAid, галоўным донарам якой з'яўляецца брытанскі Дэпартамент міжнароднага развіцця (Department for International Development, DfID). Штогод урад Злучанага каралеўства накіроўвае на дапамогу за мяжу сродкі ў памеры 0,7% ВУП краіны, і часцяком Лондан не можа кантраляваць і распараджацца пералічанымі фінансамі: гэтыя паўнамоцтвы знаходзяцца ў падпарадкаванні кіраўніцтва праграм. Такім чынам Беларусь атрымлівае фінансавую падтрымку з Еўропы, нягледзячы на рэпрэсіі супраць дэмакратычнай апазіцыі.