Менчукі: «Мы кожны дзень чакаем дэвальвацыі»

Як людзі рэагуюць на павольнае, але бесперапыннае абясцэньванне нацыянальнай валюты?

Амаль штодня курс даляра і еўра ў адносінах да беларускага рубля павышаецца. На 20 лістапада Нацыянальны банк абвясціў, што курс еўра павялічыўся на 30 рублёў у параўнанні з папярэднім днём, курс даляра - на 10 рублёў. Як людзі рэагуюць на павольнае, але бесперапыннае абясцэньванне нацыянальнай валюты, ці асцерагаюцца дэвальвацыі, што абяцаюць ўлады, і якія прагнозы даюць эксперты?

Абменны пункт «БелВЭБ-банка», размешчаны каля ЦУМа ў Менску. Чэргаў пакуль няма. Падыходзяць людзі па адным, па два чалавекі, часцей за ўсё здаюць невялікія сумы ў 20-30 даляраў, але ажыятажу, чэргаў і панікі, як было летам 2011 года, няма. Журналісты «Радыё Свабода» запыталіся ў кліентаў, якія абменьваюць валюту, ці не баяцца яны дэвальвацыі.

Мужчына: «Ёсць вялікая верагоднасць дэвальвацыі. Усе прыкметы ў наяўнасці: даляр расце, пастаянна расце - гэта асноўны паказчык».

Жанчына: «Мы кожны дзень чакаем дэвальвацыі. А хто ведае, калі яна будзе! Але будзе абавязкова. Таму што грошы абясцэніліся. Таму я і мяняю, толькі тое, што мне трэба на бліжэйшыя два-тры дні».

- А купіць атрымоўваецца з заробку або пенсіі «на чорны дзень»?

Жанчына: «На чорны дзень - не, вядома. Якое там купіць... На пенсію не разгонішся. На 2 мільёна 100 тысяч я нават туфлі новыя не магу купіць - паесці толькі і за кватэру заплаціць».

Малады чалавек: «Што тычыцца дэвальвацыі, можа быць. У гэтай краіне можа быць што заўгодна. Ніхто ні ад чаго не застрахаваны. Наогул, у гэтым я не бачу нічога дрэннага, любыя змены - яны да лепшага. Я пазітыўны чалавек, аптыміст».

Юнак: «Дэвальвацыя? А што гэта такое? Калі рубель абвальваецца? Баімся. Калі грошы абясцэньваюцца - гэта дрэнна».

Мужчына: «Дэвальвацыі ўсе баяцца. Яна цалкам магчымая».

Юнак: «Я лічу, што зараз дэвальвацыі не будзе. Даляр так рэзка не будзе расці. Хоць я не эксперт, я звычайны мінак».

Мужчына: «Дэвальвацыя можа быць, але гэта пытанне часу. Я спадзяюся, што яна будзе не цяпер. Магчыма, недзе гады праз два».

Лукашэнка ў апошнія некалькі месяцаў неаднаразова то супакойваў народ, што «дэвальвацыі не будзе», то палохаў - маўляў, «калі будзе дэвальвацыя - вы самі яе зробіце». Апошні раз тэму дэвальвацыі ён закранаў тыдзень таму, наведваючы «Керамін»: «Вы бегаеце па абменніках і чакаеце нейкай дэвальвацыі. Проста раю вам: не рабіце гэтага, не чакайце. Мы паставілі перад сабой галоўную задачу: не дапусціць ніякіх абвалаў. Таму не трэба бегаць...»

Экс-старшыня Нацыянальнага банка, прафесар Станіслаў Багданкевіч кажа, што калі ўлады суцяшаюць народ, што дэвальвацыі не будзе, яна абавязкова адбудзецца:

«Я думаю, народ разумее правільна. Чым больш Лукашэнка кажа, што не будзе дэвальвацыі, тым больш народ пазбаўляецца ад пустых рублёвых грашовых знакаў, якія немаюць каштоўнасці, і пераводзіцьалюту. Ён быццам бы палохае людзей, але навошта ён гэта робіць, я не ведаю. У нас жа калі ўлада кажа, што не будзе нешта рабіць - абавязкова робіць. Так ужо было ў гісторыі, і неаднаразова».