Мікалай Азараў: Украіна вернецца да пагаднення з ЕЗ праз паўгода

Прэм'ер-міністр Украіны заяўляе аб магчымасці вярнуцца да падрыхтоўкі падпісання пагаднення аб асацыяцыі з ЕЗ.

Пра гэта ён сказаў у эфіры праграмы Шустэр Live на тэлеканале Інтэр увечары 22 лістапада, піша «Карэспандэнт».

«Я ніякай трагедыі не бачу, ніякай гістарычнасці ў гэтым моманце, калі мы праз паўгода вернемся да гэтага пытання», - сказаў ён. Мікалай Азараў падкрэсліў, што дзеючая ўлада не адмовілася ад стратэгічнага курсу на еўраінтэграцыю, а толькі змяніла тактыку.

Пры гэтым ён адзначыў, што пастанову аб прыпыненні падрыхтоўкі да падпісання была прынятая ў сувязі з тым, што ЕЗ за некалькі месяцаў, нягледзячы на абяцанні, не распачаў ніякіх крокаў для дапамогі Украіне ва ўкладанні пагаднення з Міжнародным валютным фондам.

Азараў растлумачыў, што Украіна прасіла ЕЗ дапамагчы падпісаць пагадненне з МВФ для прадстаўлення крэдыту ў сувязі са стратай за студзень-верасень 2013 года больш за два млрд грыўняў праз адсутнасць у Расеі попыту на ўкраінскія трубы, вагоны і кандытарскія вырабы.

Прэм'ер-міністр таксама паведаміў, што ўкраінская старана заклікала ЕЗ не ўспрымаць трагічна факт прыпынення Украінай падпісання пагаднення і вярнуцца да перамоўных працэсаў пасля аднаўлення тавараабароту Украіны з Расеяй.

Раней прэм'ер-міністр Украіны Мікалай Азараў заяўляў, што гатовы сысці ў адстаўку, калі яго аргументы за прыпыненне перамоў аб падрыхтоўцы да падпісання пагаднення аб асацыяцыі з ЕЗ не слушныя.

Пры гэтым прэм'ер-міністр заявіў, што прыпыненне працэсу падрыхтоўкі да падпісання пагаднення аб асацыяцыі з ЕЗ яшчэ не азначае, што Украіна збіраецца ўступіць у Мытны саюз.

Нагадаем, 21 лістапада Вярхоўная Рада Украіны ў прысутнасці назіральнікаў ад Еўрапарламента не змагла прыняць ні адзін варыянт з шасці законапраектаў, якія прадугледжваюць лячэнне асуджаных грамадзян за мяжой і неабходных для падпісання Пагаднення аб асацыяцыі з ЕЗ. Галасаванне завяршылася пад агульныя крыкі апазіцыйных нардэпаў «Ганьба!» На адрас калегаў з самай вялікай фракцыі Партыі рэгіёнаў і фракцыі Кампартыі, бо менавіта яны не падтрымалі ніводзін з дакументаў. Адзіным рэгіяналам, які падтрымаў чатыры з шасці законапраектаў, стаў Нестар Шуфрыч. Разам з ім адзін з законапраектаў падтрымала «рэгіяналка» Ірына Беражная. Астатнія прадстаўнікі кіруючай партыі не прагаласавалі, праз што Рада не змагла набраць больш 195 галасоў.

На фоне ўсяго гэтага Кабінет міністраў Украіны вырашыў прыпыніць працэс падрыхтоўкі да падпісання СА з Еўразвязам, а таксама прыняў распараджэнне, згодна з якім урад ініцыюе стварэнне трохбаковай камісіі пры ўдзеле Еўрапейскага Звязу і Расейскай Федэрацыі. Прэзідэнт Расеі Уладзімір Пуцін тут жа заявіў, што Масква гатовая да трохбаковых перамоваў для развязання пытанняў, звязаных з магчымым падпісанне пагаднення аб асацыяцыі Украіны з ЕЗ.

28-29 лістапада ў Вільні адбудзецца саміт Еўрапейскага Звязу. На ім чакалася падпісанне пагаднення аб асацыяцыі з Украінай. Для гэтага Украіне заставалася прыняць некалькі законапраектаў і развязаць пытанне зняволенай экс-прэм'еркі Юліі Цімашэнкі. У апошні час Кіеў дэманстраваў рашучасць на шляху да еўраінтэграцыі. Аднак, 9 лістапада ў Расеі адбылася таемная сустрэча прэзідэнтаў Януковіча і Пуціна, змест якой застаецца невядомым. Пасля гэтага ўкраінская ўлада рэзка змяніла рыторыку.