На саміт у Вільню едзе Макей

Беларускую дэлегацыю на Віленскім саміце ўзначаліць кіраўнік МЗС Уладзімір Макей.

Пра гэта паведамляе прэс-служба МЗС.

«Беларускую дэлегацыю на Віленскім саміце ўзначаліць міністр замежных спраў Рэспублікі Беларусь Уладзімір Макей, які прадставіць пазіцыю і падыходы Беларусі ў дачыненні да «Усходняга партнёрства» і далейшага развіцця гэтай ініцыятывы ў ходзе пленарнай дыскусіі 29 лістапада 2013 года», - гаворыцца ў паведамленні.

У рамках саміту мяркуецца правядзенне двухбаковых сустрэч кіраўніка беларускай дэлегацыі з прадстаўнікамі краін-удзельніц ЕЗ і краін-партнёраў, а таксама кіраўніцтва еўрапейскіх структур.

Акрамя таго, напярэдадні саміту «Усходняга партнёрства» ў Вільні пройдзе другі бізнес-форум УП, ініцыятарам стварэння якога ў свой час выступіла Рэспубліка Беларусь. Плануецца, што Беларусь на гэтым мерапрыемстве будзе прадстаўляць Міністр эканомікі Мікалай Снапкоў.

Нагадаем, саміт Усходняга партнёрства (УП) пройдзе ў Вільні (Літва) 28-29 лістапада. 15 кастрычніка віцэ-міністр замежных спраў Літвы Андрус Крывас перадаў кіраўнікам дыпламатычных місій краін-удзельніц УП у Літве запрашэнні для іх дзяржаў на трэці саміт ініцыятывы. Беларусь атрымала безыменнае запрашэнне на саміт.

Раней многія еўрапейскія і амерыканскія палітыкі заяўлялі, што на саміт нельга запрашаць прадстаўнікоў рэжыму Лукашэнкі.