Радаслаў Сікорскі прапанаваў адмяніць візы для беларусаў

Міністр замежных спраў Польшчы лічыць, што неабходна пайсці на палягчэнне візавага рэжыму з Беларуссю.

Еўрапейская камісія ўчора прапанавала адмяніць візы для грамадзян Малдовы. Падобнае можна было б прапанаваць Беларусі, але каб гэта зрабіць, Беларусь павінна выканаць чатыры ўмовы, лічыць міністр замежных спраў Польшчы Радаслаў Сікорскі, перадае «Радыё Рацыя».

«Польшча дае вельмі шмат шэнгенскіх віз у Беларусі. Польшча таксама прапанавала, падпісала і ратыфікавала Пагадненне аб малым памежным руху. Але каб можна было адмяніць шэнгенскія візы, трэба выканаць чатыры ўмовы: трэба мець мяжу пад кантролем, пагадненне аб рэадмісіі, біяметрычныя пашпарты, базы дадзеных гэтых пашпартоў, а таксама павінен быць адпаведны палітычны клімат паміж гэтай краінай і Еўразвязам. Некаторыя з гэтых умоў адсутнічаюць у выпадку Беларусі», - заявіў ён.

Нагадаем, у пачатку лістапада Польшча прапанавала Беларусі пайсці на ўзаемную адмену віз. Пра гэта заявіў на прэс-канферэнцыі Надзвычайны і Паўнамоцны Амбасадар Польшчы ў Беларусі Лешэк Шарэпка.

«Мы выступаем за максімальнае спрашчэнне візавага рэжыму з Беларуссю і адмену віз. Польшча - прыхільнік таго, каб цалкам адмяніць візы з Беларуссю», - сказаў тады кіраўнік польскай дыпламатычнай місіі.