Раман Якаўлеўскі: Лукашэнка сарваўся ў Ашхабад за грашыма

Раптоўны візіт кіраўніка ў Туркменістан выкліканы вострым недахопам фінансаў.

Пра гэта заявіў палітычны аглядальнік Раман Якаўлеўскі, каментуючы сайту charter97.org візіт беларускага дыктатара ў Ашхабад.

«Як заўсёды, Лукашэнка шукае грошы. Але, на мой погляд, у цяперашняга візіту ёсць дзве асаблівасці. Першая, чакалася, што на саміт СНД прыляціць туркменскі прэзідэнт. Напярэдадні мы чулі афіцыйныя паведамленні, што ўсе без выключэння прэзідэнты прынялі запрашэнне Лукашэнкі прыехаць у Менск. Аднак сярод тых, хто нібыта прыняў запрашэнне, апынуўся не толькі кыргызскі прэзідэнт, які не прыехаў па зразумелых прычынах, але таксама і туркменскі, які наогул рэгулярна «дынаміць» такія мерапрыемствы», - адзначыў палітычны аглядальнік.

Раман Якаўлеўскі дадаў, што меркаванне пра тое, што туркменскі прэзідэнт багаты на фінансавыя рэсурсы, у апошні час ператвараецца ў міф.

«Справа ў тым, што Туркменістан стаў адчуваць вялікія цяжкасці з экспартам свайго газу, а дакладней з выручкай ад яго продажу. І, у першую чаргу, у гэтым, як запэўніваюць некаторыя эксперты, вінаваты Кітай. Справа ў тым, што Кітай пабудаваў у Туркменістане трубаправод для атрымання газу і стаў яго атрымліваць, але не плаціць за яго. Гэта значыць туркменскі прэзідэнт не атрымлівае за гэта чаканых фінансаў, а кітайцы гэта тлумачаць тым, што будаўніцтва самой трубы з'яўляецца той платай за газ, які яны атрымліваюць. І, натуральна, фінансавыя магчымасці Бердымухамедава маглі рэзка скараціцца. Другі момант, які тычыцца экспарту туркменскага газу звязаны з тым, што Расея стала моцна абмяжоўваць транзіт туркменскага газу праз сваю тэрыторыю. Гэта значыць зноў нейкія складанасці. Таму Лукашэнка, прыляцеўшы ў Туркменістан, можа сутыкнуцца з такімі тлумачэннямі, як недахоп грошай», - мяркуе аглядальнік.

Раман Якаўлеўскі лічыць, што другі момант, які можа прадстаўляць цікавасць у двухбаковых адносінах, гэта экспарт сельгастэхнікі, якой затавараныя склады МТЗ.

«Я нагадаю, што быў спецпраект па зборцы трохколавых трактароў «Беларус» для ўборкі сельгаскультур у Туркменістане. І хацелася б даведацца як мага дакладней, які лёс гэтага праекта на сённяшні дзень - колькі пастаўлена гэтай спецтэхнікі ў Туркменістан і колькі за гэта атрымана. У свой час Ашхабад быў вельмі акуратны ў плацяжах і нават ажыццяўляў перадаплату, калі ў яго былі фінансы. А па вышэйпаказаных прычынах цалкам магчыма, што ён ужо не зможа так ратаваць беларускага вытворцу. Напэўна, усе гэтыя справы збіраюцца вырашыць на двухбаковай аснове і менавіта на такім узроўні», - сказаў Якаўлеўскі.

Аглядальнік таксама адзначыў, што гэты візіт не анансаваўся, а звычайна загадзя вядома пра тое, хто і куды ідзе.

«Мабыць, гэты раптоўны візіт выкліканы вострым недахопам фінансавых рэсурсаў, які сёння адчувае Лукашэнка, і гэта відавочна. Можа быць, ён разлічвае на тое, што туркменскі прэзідэнт пазычыць яму буйную суму на кароткі перыяд, як гэта зрабіў у свой час Азербайджан, калі ў Менску былі складанасці з «Газпрамам». Калі з гэтага нешта атрымаецца, то пра гэта, хутчэй за ўсё, паведамяць. А калі не, то мы і надалей будзем чуць тое, што не адпавядае рэчаіснасці. І, вядома, трэба яшчэ ўважліва паглядзець, хто будзе суправаджаць Лукашэнку падчас гэтага візіту - гэта таксама можа адказаць на многія пытанні. Я думаю, што калі і ёсць нейкая дэлегацыя, то ў ёй будуць прадстаўнікі МТЗ і, магчыма, МАЗа. Дарэчы, самалёт, на якім прыляціць высокі госць з Менска, некалі належаў Туркменбашы, і пасля доўгіх гадоў адсутнасці на туркменскай зямлі мясцовыя жыхары змогуць яго ўбачыць», - з іроніяй сказаў Раман Якаўлеўскі.

Нагадаем, беларускі кіраўнік сёння накіраваўся з афіцыйным візітам у Ашхабад, дзе запланаваныя перамовы з прэзідэнтам Туркменістана Гурбангулы Бердымухамедавым у фармаце сам-насам і ў пашыраным складзе.