Гучныя адстаўкі ва ўрадзе

(абноўлена - 14:50) Лукашэнка звольніў Тура, Кабякову аб'яўленая строгая вымова, Сямашку пагражае артыкул.

Лукашэнка адправіў у адстаўку намесніка кіраўніка сваёй адміністрацыі Андрэя Тура, кіраўніку адміністрацыі Андрэю Кабякову аб'яўленая строгая вымова з апошнім папярэджаннем.

«Адміністрацыя прэзідэнта: прыехалі сюды, як назіральнікі. Таму праект указа аб вызваленні Тура ад займанай пасады. Па Кабякову - строгая вымова з апошнім папярэджаннем», - заявіў Лукашэнка, падводзячы вынікі свайго наведвання ААТ «Барысаўдрэў», перадае «Інтэрфакс».

Кіраўнік таксама распарадзіўся абвясціць вымову свайму памочніку, які «з вамі тут працуе разам».

Лукашэнка даручыў да 10 снежня падрыхтаваць нараду па пытаннях рэалізацыі інвестыцыйных праектаў на дрэваапрацоўчых прадпрыемствах краіны.

Звяртаючыся да старшыні камітэта дзяржкантролю Аляксандра Якабсона, ён сказаў: «Ты ствараеш камісію, глядзіш планы мадэрнізацыі, глядзіш глыбей, што там адбываецца». «Не чакай мяне, таму што я ўжо цябе вадзіць ужо буду там (па ААТ «Барысаўдрэў»), а не Сямашка (Уладзімір Сямашка - першы віцэ-прэм'ер - ІФ ) з Батурам (Барыс Батура - да цяперашняга часу старшыня Менаблвыканкама - ІФ)», - працягнуў Лукашэнка. «Усюды паглядзіш, як у Кабякова (кіраўнік адміністрацыі прэзідэнта - ІФ) камісія па будаўніцтве, - сапраўды гэтак жа стварай працоўную групу. І кожнае прадпрыемства прайсці, усё, што ў дзяржаўнай праграме мадэрнізацыі дрэваапрацоўчай прамысловасці, прааналізаваць», - даручыў ён.

Пры гэтым, акцэнтаваў увагу Лукашэнка, «асаблівую ўвагу Віцебску, да 10 снежня мы праводзім там нараду».

Лукашэнка таксама вызваліў ад займанай пасады старшыню Менскага аблвыканкама Барыса Батуру і старшыню канцэрна «Беллеспаперапрам» Аляксандра Пераслаўцава і пагражае чыноўнікам узбуджэннем крымінальных спраў.

«Батуру вызваліць ад займанай пасады і накіраваць сюды (ААТ «Барысаўдрэў» - ІФ) кіраўніком. Калі праз тры дні не выйдзе на працу, распачаць крымінальную справу па ім. Калі ён тут не ўправіцца да вясны - узбудзіць крымінальную справу», - заявіў Лукашэнка.

Ён таксама запатрабаваў старшыню канцэрна «Беллеспаперапрам» Пераслаўцава «сюды, да яго (да Б.Батуры - ІФ) памочнікам». «Адхіліць ад займанай пасады (кіраўніка канцэрна - ІФ) і прызначыць сюды», - заявіў Лукашэнка.

Звяртаючыся да кіраўніцтва Камітэта дзяржкантролю, дыктатар таксама заявіў, што «калі ў вас будуць мінімальныя падазрэнні па старшыні канцэрна, па Батуры, па Сямашку (першы віцэ-прэм'ер - ІФ), то неадкладна ўключайце іх у крымінальную справу». «Па Сямашку прымем рашэнне пасля таго, як правядзем нараду па дрэваапрацоўцы», - заявіў Лукашэнка.

Кіраўнік таксама запатрабаваў ад міністра будаўніцтва і архітэктуры Анатоля Чорнага «пачынаць працаваць». «Цябе ратуе толькі тое, што ты тры дні без году тыдзень працуеш. Наводзь жалезны парадак. Ты ведаеш, што рабіць тут. Бо мы будзем хадзіць і вечна куляцца: то ў нас валюты не хопіць, то яшчэ штосьці. Мы тут загубілі мільёны даляраў», - заявіў Лукашэнка.

Падставай для такіх жорсткіх рашэнняў кіраўніка стала невыкананне яго даручэнняў па мадэрнізацыі ААТ «Барысаўдрэў». Год таму ім былі дадзеныя даручэнні па рэалізацыі інвестпраекта на прадпрыемстве, а таксама «навядзенні на ім парадку».

Падчас наведвання прадпрыемства Лукашэнка змяніў запланаваны маршрут і абышоў усю тэрыторыю завода, зазірнуўшы на аб'екты і тэрыторыі, не прадугледжаныя праграмай наведвання прадпрыемства.

Ён выказаў, у прыватнасці, рэзкую незадаволенасць тым, што за цэлы год на заводзе і на прылеглых да яго тэрыторыях не быў наведзены належны парадак. Адразу ж пасля прыбыцця на ААТ «Барысаўдрэў» Лукашэнка заявіў чыноўнікам: «Вы хочаце, каб я прайшоў тут паўсюль? Гэта не праблема для мяне, але вы ў гэтай гразі можаце застацца разам з Сямашкам і губернатарам», - заявіў дыктатар.

Вялікую долю крытыкі ў свой адрас атрымалі цяпер ужо былы старшыня Менаблвыканкама Батура і шэраг іншых чыноўнікаў. «Цяпер надзену кайданкі і пойдзеце ў камеру», - сказаў ён. «Мы дамаўляліся, што тут будзе наведзены парадак».

У адказ на гэта Батура сказаў: «У мяне проста не дайшлі рукі». На што Лукашэнка заявіў: «У мяне дойдуць».