Валерый Ухналёў: Адстаўкі і перастаноўкі не выратуюць эканоміку ад краху

Перасадка чыноўнікаў з крэсла ў крэсла не вырашыць праблем краіны.

Такім чынам намеснік старшыні партыі «Справядлівы свет» Валерый Ухналёў пракаментаваў сайту charter97.org сённяшнія адстаўкі ў беларускім урадзе.

«Тут я б адзначыў два моманты. Гэтыя адстаўкі і, у першую чаргу, Тура, паказваюць, што Савет міністраў - гэта парасонавая структура, якая нічога не вырашае, а ўсё вырашаецца ў адміністрацыі Лукашэнкі. Другі момант, гэта прызнанне і агучванне таго, што ў эканоміцы Беларусі сапраўды ёсць вельмі сур'ёзныя праблемы. Гэтыя адстаўкі сведчаць аб тым, што гэтыя праблемы не вырашаюцца, а самае галоўнае, што не відаць перспектывы. Я не ведаю, якімі будуць наступныя прызначэнні, але думаю, што новых людзей, якія мысляць, неяк па-іншаму, а не камандна-адміністрацыйнымі катэгорыямі, на гарызонце пакуль што не відаць, і наўрад ці яны з'явяцца ў бліжэйшы час», - лічыць палітык .

Валерый Ухналёў перакананы, што «сённяшнія перастаноўкі і адстаўкі не выратуюць беларускую эканоміку ад краху, да якога яна набліжаецца».

«Кадравыя перастаноўкі могуць змяніць сітуацыю, калі прыходзяць новыя людзі з новым мысленнем і падыходамі, а тое, што сёння аднаго чыноўніка перасадзілі з крэсла ў крэсла, нічога не вырашае. Існуючая сістэма кіравання не дае магчымасці нешта змяніць, нават калі б чалавек хацеў гэта зрабіць. Таму ўсе гэтыя ператасоўкі не толькі не выратуюць ад краху тую мадэль эканомікі, якую падтрымлівае сёння рэжым Лукашэнкі, але нават не вырашаць самых надзённых праблемаў краіны», - падсумаваў намеснік старшыні «Справядлівага свету».

Нагадаем, беларускі кіраўнік адправіў сёння ў адстаўку намесніка кіраўніка сваёй адміністрацыі Андрэя Тура, кіраўніку адміністрацыі Андрэю Кабякову аб'яўленая строгая вымова з апошнім папярэджаннем. Лукашэнка таксама вызваліў ад займанай пасады старшыню Менскага аблвыканкама Барыса Батуру і старшыню канцэрна «Беллеспаперапрам» Аляксандра Пераслаўцава і пагражае чыноўнікам узбуджэннем крымінальных спраў.