«Рэгіянал» прапанаваў перанесці сталіцу Украіны ў Харкаў

Прадстаўнік Партыі рэгіёнаў не хавае, што прычына - у пратэстах, якія ахапілі Кіеў.

Губернатар Харкаўскай вобласці Міхаіл Добкін заклікаў перанесці сталіцу Украіны, так як на яго думку «кіяўляне падтрымліваюць акцыі на Майдане, значыць, і разруху падтрымліваюць».

Паводле апытання, на якія спасылаецца прадстаўнік партыі Януковіча, бестэрміновую акцыю прыхільнікаў еўраінтэграцыі падтрымліваюць 64% кіяўлян, толькі ў 26% яна выклікае негатыў. Пры гэтым 59% жыхароў горада гатовыя мірыцца з нязручнасцямі (у прыватнасці, з барыкадамі і смеццем на вуліцах), якія прыносіць еўрамайдан. Таксама з апытання, праведзенага кампаніяй Research & Branding Group, вынікае, што мітынгоўцаў падтрымліваюць большасць жыхароў сталіцы ва ўсіх узроставых групах. У першую чаргу гэта людзі ва ўзросце 40-49 гадоў (71% падтрымліваюць, 23% - не), моладзь да 30 гадоў (69%, супраць - 21%), у найменшай ступені - кіяўляне старэйшыя за 55 гадоў (54%, супраць - 36%).

Раней Міхаіл Добкін, які з'яўляецца членам кіруючай Партыі рэгіёнаў, ужо не раз негатыўна адгукаўся пра Еўрамайдан. Так, паводле яго слоў, «дзве галоўныя заслугі Майдана: па-першае, паказаў, што апазіцыя поўны нуль і нічога з сябе не ўяўляе, па-другое, аб'яднаў паўднёвы-ўсход».

Масавыя акцыі прыхільнікаў еўраінтэграцыі ў Кіеве і іншых рэгіёнах Украіны пачаліся 21 лістапада пасля абвяшчэння ўрадам аб прыпыненні падрыхтоўкі Пагаднення аб асацыяцыі з ЕЗ, якое планавалася аформіць на саміце «Ўсходняга партнёрства» ў Вільні. Улады краіны некалькі разоў спрабавалі спыніць іх сілавымі метадамі, зачысціўшы Майдан Незалежнасці ад намётаў і актывістаў апазіцыі. Тым не менш, людзі застаюцца ў цэнтры Кіева, а акцыі працягваюцца ўжо другі месяц.