Лукашэнка абвясціў 2014 Годам гасціннасці

Беларускі дыктатар падпісаў указ аб абвяшчэнні 2014 Годам гасціннасці.

"У мэтах развіцця турызму, стварэння сучаснай турыстычнай інфраструктуры, якая ўлічвае геаграфічнае становішча, прыродныя, гістарычныя і культурныя багацці Беларусі, выхавання ў грамадзян патрыятычнага гонару і павагі да айчыны 2014 год у Беларусі абвешчаны Годам гасціннасці", - паведамілі ў прэс-службе Лукашэнкі.

Паводле інфармацыі прэс-службы, ураду даручана супольна з аблвыканкамамі, Менскім гарвыканкамам распрацаваць і зацвердзіць рэспубліканскі план мерапрыемстваў для правядзення Года гасціннасці і забяспечыць каардынацыю дзейнасці дзяржаўных органаў, іншых арганізацый для іх выканання.

"Абвяшчэнне Года гасціннасці будзе спрыяць засяроджванню намаганняў дзяржаўных органаў, арганізацый ды грамадзян на развіцці і эфектыўным выкарыстанні турыстычных магчымасцяў Беларусі і арганізацыі на высокім узроўні прыймання замежных гасцей, якія прыбудуць на святкаванне 70-й гадавіны вызвалення Беларусі ад нямецка-фашыстоўскіх захопнікаў, мерапрыемствы чэмпіянату свету ў хакеі, іншыя міжнародныя акцыі", - падкрэслілі ў прэс-службе.

Нагадаем, што 2013-ы год абвяшчаўся Лукашэнкам Годам ашчадлівасці. У гэты год значна вырасла выдаткаванне бюджэтных грошай на ўтрыманне чыноўніцкага апарату.