Украінскі эксперт: Януковіч не зможа ўтрымацца на Дубінках «Беркута»

Бліжэйшыя дні стануць вырашальнымі для Украіны.

Такое меркаванне выказаў у інтэрв'ю сайту charter97.org кіраўнік аналітычнага цэнтра «Трэці сектар» Андрэй Залатароў.

«Не выключана, што Януковіч рыхтуе разгон акцый пратэсту. Больш за тое, цалкам магчыма, што дадзеная такая ўстаноўка, маўляў, да майго вяртання з Кітая, каб усё было спакойна. Але канкрэтныя загады і рашэнні рэалізуюць чыноўнікі, а людзі, якія знаходзяцца на вяршыні ўладнай піраміды, потым умываюць рукі, маўляў, я нічога не ведаў і не датычны. Таму Віктар Фёдаравіч паляцеў да кітайскіх таварышаў з працягнутай рукой дружбы, толькі яна працягнутая далонню ўверх. Гэта значыць відавочна, што ключавое пытанне, якое будзе цікавіць яго і ў Пекіне, і ў Маскве, гэта грошы, таму што Украіна стаіць на парозе дэфолту. І, натуральна, калі краіна знаходзіцца ў сітуацыі вострага палітычнага крызісу, то, як правіла, ніхто грошы не дае, паколькі пазычальнік сумніўны», - лічыць эксперт.

Палітолаг падкрэсліў, што таму цяпер для прэзідэнта Украіны крытычна важна, каб сітуацыя стабілізавалася, і нельга выключыць таго, што бліжэйшыя два тры дні стануць вырашальнымі.

«У Кіеве ў апошнія дні абмяркоўваюць, купіць Украіна квіток у Егіпет ці ж Беларусь. Але для беларускага сцэнара няма такіх маналітных і магутных спецслужбаў, і сілавых структур, то ёсць трымацца на гумовых палках «Беркута» неяк няёмка. І фінансава гэты варыянт мала рэальны, паколькі для ўвядзення надзвычайнага становішча ў краіне і нейкіх радыкальных дзеянняў з боку ўлады патрэбныя рэсурсы, а гэтага ў краіне як раз і няма. Арміі, па сутнасці, няма, а сістэма МУС расколатая, як гэта паказалі дзеянні львоўскага «Беркута», які адмовіўся ўдзельнічаць у разгоне львоўскага Майдана», - адзначыў аналітык.

Нагадаем, на віленскім саміце Усходняга партнёрства 28-29 лістапада прэзідэнт Віктар Януковіч не падпісаў Пагадненне аб асацыяцыі Украіны з ЕЗ. Кіеў прапанаваў Брусэлю прыцягнуць Расею да абмеркавання палажэнняў пагаднення. Еўрачыноўнікі пакуль на такую прапанову не пагаджаюцца.

Жыхары краіны ўжо адказалі на зрыў падпісання пагаднення беспрэцэдэнтнай акцыяй пратэсту. Яна праходзіць па ўсёй Украіне ўжо другі тыдзень і б'е рэкорды колькасці ўдзельнікаў падзей 2004 года. Кульмінацыяй акцыі, якую ўжо называюць «еўрарэвалюцыяй», былі нядзельныя падзеі ў Кіеве ў адказ на брутальны разгон Еўрамайдана байцамі спецпадраздзялення «Беркут». У мірнай акцыі на Майдане Незалежнасці прынялі ўдзел ад 500 да 700 тысяч чалавек. Каля рэзідэнцыі Януковіча адбыліся сутыкненні, справакаваныя некалькімі сотнямі невядомых хуліганаў у масках. Апазіцыя асудзіла правакатараў і заявіла пра працяг акцыі.