Байцам «Беркута» далі па $500 прэміі за разгон Еўрамайдана

Украінскія ўлады шчодра аддзячылі сілавікоў за начны разгон Еўрамайдана 30 лістапада.

Былыя кіраўнікі спецпадраздзяленняў «Беркут» прапаноўваюць ураду «не пераацэньваць свае сілы» ў пытанні разгону дэманстрантаў. Пра гэта заявіў журналістам першы кіраўнік «Беркута» ў Івана-Франкоўскай вобласці Андрэй Гайдай, інфармуе сайт censor.net.ua.

«Нас здзівілі словы прэм'ер-міністра, які сказаў, што ім трэба 10 хвілін, каб вызваліць Кабмін. Хай ён не пераацэньвае свае сілы», - адзначыў ён.

Акрамя таго, крыніцы «Украинской правды» паведамляюць, што цяпер «Беркут» атрымаў каманду перадыслакавацца і не ўжываць сілу.

«Яны знаходзяцца тут непадалёк, аднак сілу прымяняць не будуць, таму што на вуліцах занадта вялікая колькасць людзей», - сказаў суразмоўца.

Ён таксама дадаў, што байцы атрадаў «Беркута», якія разганялі 30 лістапада ноччу Еўрамайдан, атрымалі па 500 даляраў прэміі кожны.

Нагадаем, 30 лістапада «Беркут» з ужываннем сілы разагнаў Еўрамайдан у Кіеве. Па словах відавочцаў, каля 4 раніцы байцы спецпадраздзялення штурмавалі мітынгоўцаў, якія праводзілі акцыю ў падтрымку еўраінтэграцыі Украіны. На відэазапісах, агучаных у інтэрнэце, відаць, як байцы «Беркута» адціскаюць людзей ад манумента Незалежнасці, пры гэтым збіваючы іх дубінкамі. Кагосьці працягвалі біць нават пасля таго, як ён упаў.

На кадрах таксама відаць людзей з акрываўленымі тварамі.

Фота: klichko.org