Дзяржсакратаром Савета бяспекі прызначаны «палатачнік» Мяжуеў

Лукашэнка прызначыў Аляксандра Мяжуева дзяржаўным сакратаром Савета бяспекі.

Пра гэта паведамляе яго прэс-служба. Адпаведны ўказ кіраўнік падпісаў 5 снежня.

Нагадаем, у пачатку лістапада стала вядома, што Лукашэнка прызначыў Леаніда Мальцава, які займаў пасаду дзяржсакратара Савета бяспекі, старшынёй Дзяржпамежкамітэта. Да сённяшняга дня пасада дзяржсакратара Савета бяспекі заставалася вакантнай.

Аляксандр Мяжуеў з'яўляецца старшынёй пастаяннай камісіі «палаты прадстаўнікоў» па нацыянальнай бяспецы. У канцы лістапада Мяжуеў таксама быў прызначаны старшынёй Беларускага саюза афіцэраў.

Ён нарадзіўся ў 1959 годзе ў Ляхавічах Брэсцкай вобласці. Скончыў Кіеўскае вышэйшае агульнавайсковае каманднае вучылішча, Ваенную акадэмію ім. Фрунзэ, Ваенную акадэмію Генеральнага штаба Узброеных сіл РФ. Праходзіў службу ў камандных і штабных пасадах: камандзіра брыгады, намесніка камандуючага войскамі аператыўнага камандавання, начальніка штаба - першага намесніка камандуючага аператыўнага камандавання, камандуючага войскамі аператыўнага камандавання, начальніка Галоўнай ваеннай інспекцыі Узброеных Сіл Рэспублікі Беларусь. Член калегіі Міністэрства абароны Рэспублікі Беларусь. Абіраўся ў «палату прадстаўнікоў» па Гродзенскай выбарчай акрузе №52.

Раней эксперты выказвалі здагадкі, што дзяржсакратаром Савета бяспекі можа стаць старэйшы сын Лукашэнкі - Віктар. Падчас візіту Віктара Лукашэнкі ў сярэдзіне лістапада ў ААЭ яго нават прымалі як «кіраўніка нацыянальнай бяспекі». Пра гэта напісалі арабскія СМІ.