Палітвязню Аліневічу забараняюць вучыцца

Вось ужо трэці год начальства не дазваляе Ігару Аліневічу вучыцца ў прафтэхвучылішчы пры наваполацкай калоніі №10.

Пра гэта сайту charter97.org распавяла Валянціна Аліневіч, маці палітычнага вязня Ігара Аліневіча.

«Нягледзячы на тое, што ў сына ёсць вышэйшая адукацыя, ён імкнецца да далейшага развіцця. Каб не марнаваць час дарма, ён спрабаваў атрымаць дазвол на вучобу ў ПТВ пры калоніі. Бо гэта яшчэ і шанец адчуць сябе чалавекам, седзячы за партай у цёплым памяшканні, чаго няма ў турме. Але начальства Ігару неаднаразова ў гэтым адмаўляла, нічым не тлумачачы сваё рашэнне. Варта сказаць, што іншым зняволеным гэта было дазволена», - адзначыла маці палітвязня.

Яна таксама падкрэсліла той факт, што ад Ігара адносна доўга няма вестак.

«Сын заўсёды віншаваў мяне з Днём святога Валянціна, але ў гэтым годзе я чамусьці не атрымала ад яго лісты з віншаваннямі. І я, шчыра кажучы, занепакоеная. Дадам, што нядаўна нам было дазволена кароткатэрміновае спатканне і перадача. Пакет з прадуктамі і рэчамі правяралі паўтары гадзіны. Тры кантралёра з металашукальнікамі імкнуліся знайсці хоць што-небудзь забароненае. Нават каўбасу разрэзалі на шэсць частак. Усё гэта здаецца дзікасцю і з цяжкасцю ўкладваецца ў галаве. Добра, дазваляюць чытаць кнігі», - склала Валянціна Аліневіча.

Нагадаем, 27 траўня 2011 года суддзя Завадскога раёна Менска Жанна Хвойіцкая асудзіла Ігара Аліневіча на 8 гадоў пазбаўлення волі ў калоніі ўзмоцненага рэжыму. Цяпер ён адбывае пакаранне ў Наваполацкай калоніі № 10. Яго, а таксама Мікалая Дзядка і Аляксандра Францкевіча абвінавацілі ў арганізацыі шэсця каля будынка Мінабароны, нападзе на казіно «Шангры Ла» і ізалятар на Акрэсціна, падпале дзвярэй філіяла «Беларусбанка» і нападзе на расейскую амбасаду.