«Белнафтахім» абвінаваціў беларускіх энэргетыкаў у прагнасці
40- 20.02.2013, 20:11
Тарыфы на электраэнергію для прамысловых прадпрыемстваў Беларусі вышэйшыя за сусветныя.
У распаўсюджаным 19 лютага прэс-рэлізе канцэрн «Белнафтахім» распавёў пра ўласную інвестыцыйную дзейнасць і абвінаваціў беларускіх энэргетыкаў у зрыве шэрагу праектаў мінулай пяцігодкі, «калі ў разлікі закладваліся адны лічбы для энэргетыкі, а фактычна яны былі іншымі».
«Самае праблемнае пытанне, якое сёння стрымлівае інвестыцыйны працэс, - гэта існыя ў краіне кошты на энэргетыку, якія не дазваляюць выйсці на прымальныя тэрміны акупнасці новых вырабаў», - заяўляюць у прэс-службе канцэрна.
«Спрыяльныя ўмовы пастаўкі расейскай нафты дазваляюць канцэрну» Белнафтахім «падтрымліваць кошты рэалізацыі нафтапрадуктаў на ўнутраным рынку на ўзроўні ў сярэднім у 2,1-2,3 разы ніжэйшым за дзейныя ў Еўропе. Нафтаперапрацоўчая галіна адшуквае магчымасць падтрымліваць насельніцтва і народную гаспадарку краіны за кошт нізкіх коштаў на нафтапрадукты, плаціць значныя падаткі і акцызы, дадатковыя зборы ў бюджэт дзяржавы», - адзначаюць у канцэрне.
«У той жа час энэргетычная галіна, нягледзячы на танны імпарт прыроднага газу і электраэнэргіі, прымушае прамысловасць працаваць паводле тарыфаў вышэйшых за сусветны ўзровень», - абураюцца нафтахімікі.
«Мэтанакіравана займаючыся энэргаашчадай, арганізацыі канцэрна цягам апошніх 10 гадоў штогод скарачаюць спажыванне энергарэсурсаў на 100-300 тысяч тон умоўнага паліва пры прыросце вытворчых магутнасцяў. Аднак чаканага эканамічнага эфекту ад такога значнага скарачэння спажывання не атрымана, бо за гэты час тарыфы на энэргарэсурсы выраслі больш чым утрая. Таму пытанне энэргетычных тарыфаў у нафтахіміі, дзе доля энэргетыкі ў выдатках - на другім месцы пасля выдаткаў на сыравіну, з'яўляецца адным з найважнейшых пытанняў пры прыняцці пастаноў аб рэалізацыі новых праектаў», - робяць выснову ў канцэрне «Белнафтахім».
