29 сакавiка 2024, Пятніца, 11:39
Падтрымайце
сайт
Сім сім,
Хартыя 97!
Рубрыкі

Неўязны Макей помсціць за санкцыі

61
Неўязны Макей помсціць за санкцыі

Міністэрства замежных спраў Беларусі, астатняй дыктатуры Еўропы, падрыхтавала даклад «аб парушэнні правоў чалавека ў асобных краінах свету ў 2012 годзе».

«Мэта дакладу - надаць увагу парушэнням правоў чалавека ў краінах, якія традыцыйна ўважаюць сябе за «развітыя дэмакратыі», прадэманстраваць на канкрэтных фактах невыкананне імі сваіх міжнародных прававых абавязкаў. І, што не менш важна, згадаць аб ахвярах, якія, як правіла, замоўчваюцца і краінамі-парушальнікамі, і міжнароднымі арганізацыямі, якія спецыялізуюцца ў сферы правоў чалавека», - гаворыцца ва ўступным слове да дакладу міністра замежных спраў Уладзіміра Макея.

Кіраўнік МЗС заявіў, што «правы чалавека, якія першапачаткова з'яўляліся сферай стасункаў паміж грамадствам і дзяржавай і былі толькі элементам унутранай палітыкі, у сучасным свеце сталі адыгрываць ролю інструмента палітыкі замежнай». «Усё часцей стасункі паміж дзяржавамі ў сферы правоў чалавека фармуюцца не паводле прынцыпу роўнасці партнёраў, якія маюць розныя шляхі развіцця, але адзіную канчатковую мэту - дабрабыт сваіх грамадзян, - а на аснове дыктату, ціску і навязвання толькі сваіх, «адзіна правільных» поглядаў», - адзначыў Макей.

Кіраўнік замежнапалітычнага міністэрства заявіў, што «ігнараванне праблем прыводзіць да беспакаранасці, і, як паказвае даклад, пагаршэння становішча з правамі чалавека». «Гэтым пацвярджаецца той факт, што ў сферы правоў чалавека няма і не можа быць ні элітаў, ні басякоў, ні ментараў, ні вучняў», - сказаў Макей.

Як заяўляюць у беларускім МЗС, даклад падрыхтаваны на падставе інфармацыі беларускіх дыпламатычных прадстаўніцтваў, СМІ, ды «іншых вартых даверу адкрытых крыніц».

У дакладзе прыводзяцца факты «парушэння правоў чалавека» ў 23 еўрапейскіх краінах, у тым ліку Польшчы, Аўстрыі, Літве, Латвіі, Эстоніі, Нямеччыне, Францыі, Вялікабрытаніі, а таксама ў ЗША і Канадзе.

Нагадаем, што кіраўнік МЗС Беларусі Уладзімір Макей з'яўляецца неўязным у краіны ЕЗ і ЗША за ўдзел у рэпрэсіях супраць апазіцыі.

Напісаць каментар 61

Таксама сачыце за акаўнтамі Charter97.org у сацыяльных сетках