Чыноўнік Менгарвыканкама: Мітынгі і подпісы для нас не аргумент

Гарадскія ўлады не спяшаюцца ўлічваць меркаванне праціўнікаў ушчыльнення горада.

Нязгодным з палітыкай Менгарвыканкама начальнік аддзела горадабудаўніцтва і архітэктуры Партызанскага раёна Менска Мікалай Кацэвіч прапануе звяртацца ў суды.

Ці маюць сэнс «войны» супраць ушчыльнення забудовы, калі праект вынесены на грамадскае абмеркаванне? Фармальна мясцовыя жыхары могуць уплываць на прыняцце горадабудаўнічых рашэнняў, аднак на справе нярэдка нават тысячы подпісаў пад калектыўнымі зваротамі і стыхійныя мітынгі з плакатамі не вырашаюць роўным лікам нічога. Прыклад таму - гасцініца «Пекін» у парку 40-годдзя Кастрычніка, дамы для спецназа ва Уруччы. Што рабіць жыхарам, калі гарадскія ўлады пасля грамадскага абмеркавання даюць дабро на рэалізацыю праекта? Парадай у інтэрв'ю газеце «Звязда» падзяліўся начальнік аддзела горадабудаўніцтва і архітэктуры Партызанскага раёна Менска.

- Калі прынятае рашэнне аб заключэнні інвестыцыйнай дамовы і праектная дакументацыя прайшла экспертызу, але жыхары настроеные супраць будаўніцтва аб'екта, то яны могуць правесці незалежную экспертызу, якая дасць сваё заключэнне, - растлумачыў Мікалай Кацэвіч. - І далей канфлікт вырашыцца ў судовым парадку. Калі будзе даказана, што пляцоўка парушае нейкія будаўнічыя нарматывы, то суд рэальна выйграць. А вось эмоцыі, мітынгі і зборы подпісаў супраць ўшчыльнення не з'яўляюцца важкім аргументам.

У якасці прыкладу канфлікту чыноўнік прывёў грамадскае абмеркаванне праекта культурна-забаўляльнага цэнтра Park Avenue на скрыжаванні вуліц Пуліхава і Першамайскай. Мясцовыя жыхары асцерагаюцца з'яўлення ў складзе комплексу казіно і сабралі больш за 1300 подпісаў за адмену праекта і аднаўленне нядзейнага фантана. Рашэнне па гэтым пытанні ў Менгарвыканкаме пакуль не прынятае.

- Мы даводзім да людзей: калі з горадабудаўнічай дакументацыі вынікае, што ўсе адпавядае нарматывам, то аб'ект мае права на рэалізацыю. І людзі не могуць патрабаваць адмены будаўніцтва, - тлумачыць чыноўнік. - Таму што гарадская зямля - ​​не іх уласнасць. Але мы прапануем уносіць свае заўвагі і прапановы па аб'екце і абяцаем улічыць іх. Эмоцыі прымацца пад увагу не будуць - толькі аргументы.