СК Расеі расследуе смерць Андрэя Паніна

Галоўная ўправа Следчага камітэта Расеі распачала крымінальную справу паводле факту смерці вядомага актора Андрэя Паніна.

Справа распачатая паводле артыкулу «Наўмыснае прычыненне цяжкай шкоды здароўю, што пацягнула з неасцярожнасці смерць пацярпелага», паведамляе РБК.

Пастанова аб распачынанні справы прынятая ў сувязі з тым, што ў Андрэя Паніна была выяўленая чэрапна-мазгавая траўма, а таксама некалькі ранак на галаве. Цяпер следства праводзіць комплекс экспэртыз, якія павінны даць дакладную і канчатковую інфармацыю аб прычынах смерці актора.

У той жа час, следства падкрэслівае, што не бачыць у смерці Паніна крымінальнага характару, бо дзверы ў ягоную кватэру былі замкнёныя знутры, а таксама тое, што Андрэй Панін, паводле папярэдніх звестак, скуліўся з вышыні ўласнага росту.

Нагадаем, цела Андрэя Паніна было знойдзенае 7 сакавіка ў ягонай маскоўскай кватэры на Балаклаўскім праспекце. Дакладныя прычыны скону пакуль невядомыя. Паводле папярэдніх звестак, смерць надышла ў выніку няшчаснага выпадку.

Цырымонія адвітання з акторам адбудзецца ў ММТ імя Чэхава ў аўторак, 12 сакавіка. А.Панін будзе пахаваны на Траекураўскіх могілках у Маскве.