Беларусь залье Інданэзію малаком і «на гэтым спыняцца не мае намеру»

Адна праблема - аўстралійскія і новазеландскія канкурэнты.

Беларусь разлічвае зарабіць на пастаўках малочнай прадукцыі ў Інданэзію $150 млн. Пра гэта паведаміў сёння журналістам міністр сельскай гаспадаркі і харчавання Беларусі Леанід Заяц, перадае БелТА.

Па словах міністра, бакі заключылі мемарандум па ўзаемадзеянні ў галіне сельскай гаспадаркі. Гаворка ідзе пра пастаўкі малочнай прадукцыі, у прыватнасці, сухога абястлушчанага малака, сыраваткі ў досыць вялікіх аб'ёмах і па кошце, выгадным для Беларусі. «Ад гэтага кантракту мы можам зарабіць $150 млн. Але на гэтым, безумоўна, спыняцца не маем намеру», - сказаў Леанід Заяц.

Так, з боку Інданэзіі ёсць зацікаўленасць у пастаўках сметанковага масла, сыроў і іншай малочнай прадукцыі. «Мы абмяркоўваем магчымасць адкрыцця на тэрыторыі Беларусі сумеснага прадпрыемства па перапрацоўцы мяса. Гэты праект будзе мець свой працяг пасля наведвання Беларусі інданэзійскімі дзелавымі коламі. У працэсе перамоваў, думаю, мы знойдзем нейкае разуменне з інданэзійскім бокам у дачыненні да далейшага паглыблення кааперацыі паміж дзвюма краінамі», - адзначыў міністр.

Леанід Заяц звярнуў увагу на тое, што сур'ёзным канкурэнтам Беларусі па пастаўках малочнай прадукцыі выступаюць Новая Зеландыя і Аўстралія. «Наша задача - змяншаць выдаткі, сабекошт і працаваць над якасцю прадукцыі», - сказаў міністр.

Беларусь зацікаўлена ў прыходзе інвестыцый Інданэзіі, далейшым стварэнні сумесных вытворчасцей, а таксама наладжванні продажу сумесна вырабленай прадукцыі ў трэція краіны. Так, Лідскі камбінат хлебапрадуктаў мае намер укласці інвестыцыі ў стварэнне лініі па вытворчасці макаронных вырабаў, якія будуць прадавацца як у Беларусі, так і пастаўляцца на знешнія рынкі. Дасягнутае разуменне па стварэнні сумесных прадпрыемстваў па вытворчасці і перапрацоўцы малака ў Беларусі.

«Інданэзія зацікаўленая выбудаваць дружалюбныя эканамічныя адносіны з Беларуссю. Да гэтага часу наш рынак быў невядомы Інданэзіі, аднак цяпер у гэтай краіны ёсць вялікая цікавасць да нас. І ў нас ёсць усе магчымасці для плённага супрацоўніцтва», - адзначыў міністр.