Палудзень прысуджаны да 3,5 гадоў турмы

Былы намеснік міністра ўнутраных спраў Беларусі Яўген Палудзень прысуджаны да 3,5 гадоў пазбаўлення волі.

Прысуд абвясціла сёння раніцай ваенная калегія Вярхоўнага суда, паведамляе «Інтэрфакс».

Палудзень прызнаны вінаватым у здзяйсненні злачынстваў, прадугледжаных ч. 3 арт.424 і ч. 3 арт.426 КК Беларусі (злоўжыванне ўладай або службовымі паўнамоцтвамі асобай, якая займае адказнае становішча).

Суд таксама пастанавіў, што гэты прысуд канчатковы і абскарджанню не падлягае. У адпаведнасці з вызначэннем калегіі Ваеннага суда, расследаванне па эпізодах бязвыплатнага атрымання Br1,8 млн за афармленне дакумента, а таксама па ч. 3 арт. 430 - атрыманне хабару ў выглядзе 100 л дызпаліва - спыніць за адсутнасцю складу злачынства.

Па рашэнні суда, Палудзень мае права на працягу пяці сутак падаць заяву на пратакол рашэння суда.

Згодна з рашэннем суда, у тэрмін пакарання Палудня ўключаны тэрмін утрымання пад вартай.

Нагадаем, Палудзень быў арыштаваны 8 снежня 2011 года, 27 снежня ён быў вызвалены ад пасады намесніка міністра ўнутраных спраў - начальніка міліцыі грамадскай бяспекі і звольнены з органаў унутраных спраў Беларусі ў запас з фармулёўкай: «у сувязі з учыненнем праступкаў, якія дыскрэдытуюць званне супрацоўніка органаў унутраных спраў».

Ваенная калегія Вярхоўнага суда разглядала справу Палудня ў закрытым рэжыме.

Намеснікам кіраўніка МУС - начальнікам міліцыі грамадскай бяспекі Яўген Палудзень быў прызначаны 4 жніўня 2009 года.

Ён прысутнічаў на акцыях пратэсту апазіцыі і асабіста камандаваў іх разгонамі.