Следчы па справе Аўтуховіча ўцёк у ЗША

Следчы, які вёў першую справу Мікалая Аўтуховіча, перабраўся на сталае месца жыхарства ў ЗША.

Фотаздымкі з ЗША старэйшы следчы Упраўлення ДФР КДК па Гродзенскай вобласці Мікалай Аліхвер размясціў у сацыяльнай сетцы «Одноклассники».

Як паведаміла ў сваім акаўнце ў «Фэйсбуку» рэжысёр Вольга Нікалайчык, інфармацыю аб выездзе следчага на СМЖ у ЗША ёй паведамілі сябры палітвязня Аўтуховіча:

«У «Одноклассниках» выплыў той самы Аліхвер - старшы следчы Упраўлення ДФР КДК па Гродзенскай вобласці, які давёў справу Мікалая Аўтуховіча і Юрыя Лявонава ў 2003-05 гадах да суда. Тады, калі вы памятаеце, хлопцы ўпершыню былі асуджаныя за так званае эканамічнае злачынства па сфабрыкаванай справе і адбывалі пакаранне ў калоніі строгага рэжыму. Усе былі здзіўленыя, калі следчы Аліхвер, які знаходзіцца ў кіраўніцтва КДК на добрым рахунку, раптам пасля суда звольніўся з шэрагаў міліцыі і знік. Казалі, што быццам бы з'ехаў у ЗША. Здаецца, выйграў у латарэю Green Card.

Мікалай Аўтуховіч, вызваліўшыся, быў на прыёме ў амбасадара ЗША Карэн Сцюарт. Ён спытаў у яе, ці можна ўдакладніць, ці так гэта. Яна абяцала дапамагчы. Але, на жаль...

І вось сёння «Одноклассники» прапанавалі мне з ім пасябраваць. Пазнаю знаёмую фізіяномію і чытаю: Мікалай Аліхвер, 35 гадоў, Атланта, ЗША.

Але, што больш усяго ўразіла мяне, так гэта яго статус над фатаграфіяй - «Я шчаслівы!». Ён на фота стаіць у абдымку з жонкай. Я гляджу і бачу, так, сапраўды яны абодва свецяцца ад шчасця. Чаго толькі ў жыцці не бывае! Аўтуховіч дагнівае другі тэрмін у турме, а ён - шчаслівы! Цынізм вышэйшай ступені.

Раз Аліхвер зараз шчаслівы, значыць, яго не мучаць згрызоты сумлення. Раз ён нічога не баіцца, выстаўляючы сваё фота ў сацыяльнай сетцы, значыць, зможа даць нашым журналістам інтэрв'ю. Ці не так? Ужо, каму-каму, а яму ёсць пра што расказаць. Тым больш, што мы ведаем, як цяпер яго шукаць».

Нагадаем, Мікалай Аўтуховіч прысуджаны да 5 гадоў зняволення ва ўмовах строгага рэжыму за выкрыццё фактаў карупцыі сярод прадстаўнікоў мясцовых уладаў.