Намесніка дырэктара менскай птушкафабрыкі абвінавачваюць у фальсіфікацыі

Пракуратурай Менскай вобласці распачатая крымінальная справа ў дачыненні да намесніка генеральнага дырэктара ААТ «1-я Менская птушкафабрыка».

Яму інкрымінуецца фальсіфікацыя з дадзенымі па зборы збожжа на пасадзе дырэктара КСУП «Племптушкарэпрадуктар «Праўда», піша «Ежедневник».

Племянны птушкагадоўчы завод «Праўда» быў створаны яшчэ ў савецкі час на базе некалькіх адстаючых калгасаў для гадоўлі і ўдасканалення высокапрадукцыйных спецыялізаваных парод курэй яйценоскага кірунку. У 2002 годзе ў склад завода увайшло таксама Менскае раённае ўнітарнае сельскагаспадарчага прадпрыемства «Саўгас ім. Энгельса».

Сёння асноўнай мэтай завода з'яўляецца насычэнне беларускага рынку якаснай прадукцыяй птушкагадоўлі, рэалізацыя сутачнага маладняку птушкі для камплектавання бацькоўскага статка бройлерных птушкафабрык рэспублікі, вытворчасці мяса буйной рагатай жывёлы, малака, вырошчванне збожжа.

Па дадзеных пракуратуры, дырэктар завода ў жніўні 2011 года даў указанне падначаленым спецыялістам унесці загадзя ілжывыя звесткі ў афіцыйныя дакументы аб зборы 1160 тон збожжа, неабходных для атрымання валавога збору 10 тысяч тон, і прыняцця яго на склад прадпрыемства. Дадзеныя дзеянні прывялі да таго, што работнікам прадпрыемства была налічаная лішняя заработная плата, а кіраўніцтва спісала гаруча-змазачныя матэрыялы, якія нібыта былі выдаткаваныя для збору збожжа.

Дадзеныя дзеянні дырэктара КСУП «Племптушкарэпрадуктар «Праўда» прывялі да нанясення шкоды прадпрыемству ў памеры больш за 46 мільёнаў рублёў.

Па факце здзяйснення супрацьпраўных дзеянняў у дачыненні да былога дырэктара КСУП «Птушкаплемрэпрадуктар «Праўда», які займае цяпер пасаду намесніка гендырэктара ААТ «1-я Менская птушкафабрыка», распачатая крымінальная справа па ч.3 арт.424 Крымінальнага кодэкса Беларусі (злоўжыванне ўладай або службовымі паўнамоцтвамі, здзейсненае службовай асобай, якая займае адказнае становішча, альбо пры выкананні функцыяў па раздзяржаўленні ці прыватызацыі дзяржаўнай маёмасці, альбо якія пацягнулі цяжкія наступствы).