Арыштаваны былы намеснік старшыні Шклоўскага райвыканкама

У дачыненні да былога першага намесніка старшыні Шклоўскага раённага выканаўчага камітэта ўзбуджаная крымінальная справа за атрыманне хабару ў асабліва буйным памеры.

«Следчым камітэтам распачатая крымінальная справа ў дачыненні да былога першага намесніка старшыні Шклоўскага раённага выканаўчага камітэта, ён арыштаваны», - паведамілі агенцтву «Інтэрфакс-Захад» у чацвер у аддзеле інфармацыі і сувязі з грамадскасцю СК Беларусі.

«Устаноўлена, што падазраваны арганізаваў заключэнне шэрагу кантрактаў на пастаўку жывёлы паміж сельскагаспадарчымі прадпрыемствамі Шклоўскага раёна і адным з недзяржаўных суб'ектаў гаспадарання на буйную суму. Падазраваны самастойна вызначыў адсотак ад здзелкі, які належыла выплаціць яму ў якасці хабару, што з'яўлялася ўмовай для заключэння кантрактаў», - паведамілі ў СК.

«Дзеянні падазраванага кваліфікаваныя следствам па ч. 3 арт. 430 (атрыманне хабару ў асабліва буйным памеры асобай, якая займае адказнае становішча) Крымінальнага кодэкса Беларусі. Да яго прымененая мера стрымання ў выглядзе заключэння пад варту», - адзначылі ў аддзеле інфармацыі і сувязі з грамадскасцю .

Былы першы намеснік старшыні Шклоўскага райвыканкама падазраецца ў тым, што «ў 2010 годзе, знаходзячыся ў гэтай пасадзе, атрымаў ад кіраўніка камерцыйнай фірмы грашовыя сродкі ў суме больш за Br69 млн, што складае асабліва буйны памер, за станоўчае вырашэнне пытання аб заключэнні кантрактаў на пастаўкі племянной жывёлы», - удакладнілі ў СК.