У Брэсце Першамай пройдзе пад нацыянальнымі сцягамі
17- 29.04.2013, 10:32
Упершыню за шмат гадоў улады Брэста дазволілі апазіцыі правесці дэманстрацыю.
Як паведамляе брэсцкі інтэрнэт-рэсурс Дзедзіч, Беларуская сацыял-дэмакратычная партыя атрымала дазвол гарвыканкама на правядзенне 1 траўня ў Брэсце дэманстрацыі за сацыяльна-эканамічныя правы. Дэманстрацыя пройдзе па праспекце Машэрава ад скрыжавання з бульварам Касманаўтаў і далей па вуліцы Леніна да гарадскога парку.
Брэсцкая абласная арганізацыя Партыі БНФ падтрымала гэтую дэманстрацыю з мэтай аб'яднання намаганняў грамадзян у барацьбе за свае сацыяльна-эканамічныя правы і заклікала сваіх прыхільнікаў прыняць актыўны ўдзел у ёй, каб выказаць пратэст супраць нізкага ўзроўню жыцця насельніцтва і росту коштаў.
Закон «Аб масавых мерапрыемствах» дазваляе пры правядзенні дэманстрацыі выкарыстоўваць плакаты, транспаранты і іншыя сродкі для публічнага выказвання сваіх грамадска-палітычных настрояў. Таму БНФ заклікаў неабыякавых людзей далучацца да дэманстрацыі са сваімі плакатамі і нацыянальнымі сцягамі.
У мінулым годзе акцыя 1 траўня ў Брэсце таксама прайшла пад нацыянальнымі колерамі.
Фота з архіву