Літва будзе купляць нарвежскі газ

Нарвежскія газ і электрычнасць могуць дапамагчы паменшыць залежнасць Вільні ад Масквы.

Пра гэта заявіла ў панядзелак прэзідэнт Літвы Даля Грыбаўскайтэ пасля сустрэч з нарвежскім кіраўніцтвам у Осла, піша ru.delfi.lt.

«Нарвежскі газ - галоўны канкурэнт у Еўропе расейскага газу і гэтым было б проста неразумна не скарыстацца», - сказала прэзідэнт у інтэрв'ю агенцтву BNS па тэлефоне. Яна абмеркавала пытанні энергетыкі з прэм'ерам Нарвегіі Енсам Сталтэнбергам.

Па словах прэзідэнта, пасля таго, як у Клайпедзе будзе абсталяваны тэрмінал звадкаванага прыроднага газу (ЗПГ), праз яго Літве можна пастаўляць і нарвежскі газ. Судна для СПГ будуе нарвежскае прадпрыемства Hoegh LNG.

«На рынку звадкаванага газу Нарвегія з'яўляецца адным з асноўных гульцоў, і мы зможам актыўна купляць у яе газ у будучыні, калі ў нас ужо будзе тэрмінал», - сказала Грыбаўскайтэ.

Цяпер Літва цалкам залежыць ад паставак паліва з боку «Газпраму». Паміж расейскай кампаніяй і мясцовымі чыноўнікамі рэгулярна ўзнікаюць канфлікты як з-за кошту на паліва (для Літвы яно даражэй, чым для Латвіі ці Эстоніі), так і з-за кіравання мясцовымі газаправодамі. Літва хацела б падзяліць здабыўныя і транспартныя кампаніі, як таго патрабуе трэці энергапакет ЕЗ. У той жа час «Газпрам», якому належыць доля ў мясцовай Lietuvos dujos, лічыць, што кампанію падзяляць нельга. З-за Lietuvos dujos «Газпрам» ужо падаваў на Літву пазоў у Стакгольмскі арбітраж, але прайграў справу.

Вільня выкарыстоўвае і іншыя шляхі для зніжэння залежнасці ад паставак энерганосьбітаў з Расеі. Так, нядаўна з'явілася інфармацыя аб тым, што Chevron будзе шукаць у Літве сланцавы газ. Для гэтага амерыканская кампанія купіла долю ў літоўскай кампаніі LL Investicijos.

Прэзідэнт сёння таксама сказала, што пасля таго, як будзе працягнутая электраэнергетычная смычка паміж Літвой і Швецыяй, у 2015 годзе з'явіцца магчымасць павялічыць імпарт нарвежскай электраэнергіі ў Літву і больш рацыянальна выкарыстоўваць Круаніскую ГАЭС.

Як сказала прэзідэнт, падлікі паказваюць, што нарвежская электрычнасць можа складаць да 35% імпартуемай з Скандынавіі электраэнергіі і прыкметна паменшыць аб'ёмы імпарту з Расеі.