У Літве адкрываюць беларускі гандлёвы цэнтр
16- 6.05.2013, 9:32
Шэрагі гульцоў рознічнага гандлю ў Літве ў хуткім часе павінна папоўніць яшчэ адна гандлёвая сетка - Fresh market.
Уладальнікі гэтай сеткі звязаныя з найбуйнейшымі беларускімі гандлярамі, а меркаваная ніша - крамы свежых прадуктаў невялікага фармату бліжэй да дома, піша Verslo žinios.
Сетка Fresh market у Літве зарэгістраваная ў канцы студзеня гэтага года. Галоўны акцыянер кампаніі - прадпрыемства аптовага гандлю Ipsun, якое імпартуе садавіну, гародніну, раслінны алей, піша ru.delfi.lt.
Саўлюс Урбонас, кіраўнік прадпрыемства Ipsun, пацвердзіў, што плануецца адкрыць крамы, ідуць перамовы з літоўскімі пастаўшчыкамі, але канкрэтныя планы і мэты кампанія пакуль не каментуе.
Па дадзеных Цэнтра рэгістра, адзіны акцыянер Ipsun - зарэгістраваная на Кіпры кампанія Ipsun Holding Limited. Па словах пастаўшчыкоў, інвестыцыі прыходзяць з Беларусі, а інвестары звязаныя з акцыянерамі найбуйнейшай беларускай гандлёвай сеткі Euroopt.
Сцвярджаецца, што ў гэтай сетцы, у якой 131 крама, найбольш нізкія кошты.