Намеснік кіраўніка Баранавіцкага гарвыканкама трапіўся на крадзяжах?

У дачыненні да намесніка старшыні Баранавіцкага гарвыканкама ўзбуджаная крымінальная справа за злоўжыванне ўладай.

Пра гэта charter97.org паведаміў чытач сайта.

«У дачыненні да былога начальніка ўпраўлення адукацыі, цяпер намесніка старшыні Баранавіцкага гарвыканкама Ігара Стасевіча ўзбуджаная крымінальная справа па артыкуле 424 «Злоўжыванне ўладай ці службовымі паўнамоцтвамі» Крымінальнага кодэкса Рэспублікі Беларусь», - адзначыў чытач.

Ён падкрэсліў, што Стасевіч усё жыццё прапрацаваў у сістэме адукацыі.

«Спачатку быў настаўнікам, пасля дырэктарам СШ № 16 горада Баранавічы, а ў выніку з ганьбай скончыў сваю кар'еру, будучы абвінавачаным у крадзяжы ўсяго 1,5 мільёна рублёў. Дадзеныя сродкі ён прысвоіў сабе, спісаўшы на прадстаўнічыя выдаткі, прызначаныя для прыёму замежных гасцей горада. Аналагічныя ж выдаткі ў гэты раз і раней аплачваліся на «добраахвотна-прымусовай аснове» прадпрымальнікамі горада», - упэўнены чытач.

Ён дадаў, што заява ў Баранавіцкі ГАУС паступіла ад прадпрымальніка.

«Працаўнікі гарвыканкама і дырэктары дзяржпрадпрыемстваў, атрымліваючы параўнальна невялікія заробкі, дзіўна чэпка трымаюцца за свае працоўныя месцы. Верагодна кожны з іх мае сваю падобную «схему», якая прыносіць у дзесяткі разоў больш, чым афіцыйны даход», - перакананы чытач.

У самым гарвыканкаме дадзеную інфармацыю сайту charter97.org ускосна пацвердзілі, паведаміўшы, што ён на бальнічным і зусім невядома, калі будзе на працоўным месцы.

Ва ўпраўленні Следчага камітэта па Брэсцкай вобласці інфармацыю аб узбуджэнні крымінальнай справы ў дачыненні да гэтага чыноўніка каментаваць адмовіліся, спаслаўшыся на неабходнасць афіцыйнага запыту.

Нагадаем, арышты высокапастаўленых прадстаўнікоў улады здараюцца ў Беларусі даволі часта. Найбольш гучныя - гэта справы з удзелам старшыні Гомельскага гарвыканкама Віктарa Піліпца, намесніка міністра ўнутраных спраў Беларусі Яўгена Палудня, начальніка галоўнага ўпраўлення ўласнай бяспекі МУС, падпалкоўніка міліцыі Уладзіміра Кротава. Таксама на карупцыйных злачынствах часта трапляюцца «дэпутаты» ўсіх узроўняў.