Ладуцька: Алкаголікаў і дармаедаў - на ўладкоўванне газонаў

«Мэр» Менска Мікалай Ладуцька патрабуе, каб менскіх алкаголікаў і дармаедаў прыцягвалі да ўладкоўвання газонаў і двароў.

Грамадзян, якія ў Менску вядуць асацыяльны лад жыцця, трэба больш актыўна прыцягваць да грамадскай працы. Пра гэта заявіў сёння старшыня Менгарвыканкама Мікалай Ладуцька, перадае БелТА.

Тэма барацьбы з п'янствам, алкагалізмам і дармаедствам абмяркоўваецца досыць часта на розных узроўнях, прымаюцца меры ў гэтым кірунку, але кардынальнага паляпшэння сітуацыі не назіраецца. Неаднаразова даваліся даручэнні па правядзенні ў сталіцы акцый з удзелам асоб без пэўнага месца жыхарства. Некалькі такіх мерапрыемстваў адбылося, але праца не набыла сістэмны характар.

«Варта канстатаваць, што мы недастаткова займаемся гэтай катэгорыяй жыхароў. І ў першую чаргу ёсць недапрацоўкі на месцах. Тут неабходная каардынацыя намаганняў праваахоўных органаў, раённых адміністрацый, камунальных службаў, пунктаў грамадскага парадку», - лічыць Мікалай Ладуцька.

Прапануецца прыцягваць грамадзян, якія вядуць асацыяльны лад жыцця, да ўладкоўвання газонаў, ліквідацыі надпісаў на сценах, добраўпарадкавання тэрыторый.

Нагадаем, на гэтым тыдні «дэпутаты» зноў заклапаціліся праблемай грамадзян краіны, якія афіцыйна нідзе не працуюць. «Палатачнік» Аляксандр Ярашэвіч прапанаваў караць грамадзян за «дармаедства».