Пратэст прадпрымальнікаў у Баранавічах: Нам не патрэбны такі саюз

Каля 200 індывідуальных прадпрымальнікаў правялі стыхійны мітынг каля будынка гарадской падатковай інспекцыі.

Яны пастанавілі пачаць з 2 ліпеня бестэрміновую забастоўку, перадае «Радыё Свабода».

Як распавёў прадпрымальнік Мікалай Чарнавус, прычына пратэсту - дадатковая сертыфікацыя тавару згодна з новымі тэхрэгламентамі Мытнага саюза.

«Вырашылі, што не будзем плаціць падаткі, а будзем баставаць. Выступілі, абмеркавалі і прагаласавалі за гэта. Усе сказалі - баставаць, ніхто не сказаў, што выйдзе на працу», - сказаў ён.

Мікалай Чарнавус стаяў з плакатам «Нам не патрэбны такі Мытны саюз».

Да прадпрымальнікаў пад'ехалі міліцыянты на двух машынах, але абышлося без затрыманняў.

Нагадаем, 27 чэрвеня беларускія прадпрымальнікі правялі агульнанацыянальную забастоўку. Не працавалі многія рынкі ў Менску, абласных цэнтрах і дзесятках іншых гарадоў краіны. Рашэнне пра забастоўку прыняў Форум прадпрымальнікаў, прысвечаны пытанням укаранення тэхнічнага рэгламенту Мытнага саюза «Аб бяспецы лёгкай прамысловасці», які прайшоў 24 чэрвеня ў Менску.