Беларускія кіроўцы будуць плаціць за дэзінфекцыю іх аўто ад чумы свіней

Літва ў сярэдзіне жніўня можа ўвесці збор, якім будуць абкладацца транспартныя сродкі, што дэзінфікуюцца ў мэтах прафілактыкі распаўсюджвання афрыканскай чумы свіней з Беларусі.

«Прыблізна 25 літаў для грузавых аўтамабіляў і 5 літаў для легкавых, якія ўязджаюць у Літву, паколькі сканчаюцца сродкі, якія мы атрымалі ад дзяржавы», - паведаміў дырэктар Літоўскай ветэрынарна-харчовай службы Ёнас Мілюс журналістам у панядзелак, перадае «Інтэрфакс».

Паводле яго слоў, у цяперашні час вядуцца кансультацыі з Мінюстам і ўрадам з нагоды магчымасці ўводу такога збору.

У панядзелак, 29 ліпеня, кіраўніка ветэрынарных службаў Латвіі, Літвы, Эстоніі і Польшчы правялі ў Вільні нараду, прысвечаную праблеме АЧС. Яны сышліся ў меркаванні, што на мяжы з Расеяй і Беларуссю варта стварыць буферную зону, пабудаваць плот, які будзе абмяжоўваць міграцыю дзікіх жывёл, і закупіць абсталяванне для дэзінфекцыі.

«Мы падрыхтавалі пастанову і накіравалі яе ў Еўракамісію», - сказаў Мілюс журналістам па выніках нарады.

Чатыры краіны чакаюць ад ЕК фінансавай дапамогі для рэалізацыі названых мер.

Пры гэтым удзельнікі нарады не выпрацавалі адзіную пазіцыю наконт таго, ці трэба знішчаць свіней на мяжы з Беларуссю і рабіць больш жорсткім парадак імпарту кармоў.

Так, намеснік кіраўніка Ветэрынарнай інспекцыі Польшчы Кшыштаф Яздзеўскі заявіў, што сітуацыя на мяжы розных краін не аднолькавая. «У нас (у Польшчы - ІФ) не так шмат свіней у хатніх гаспадарках на мяжы з Беларуссю. Мы не лічым, што свінні на мяжы могуць быць праблемай для нас», - сказаў ён.

Акрамя таго, польскі прадстаўнік скептычна ацаніў магчымасць таго, што ўладальнікам свіней у прымежжы будуць выплачаныя кампенсацыі за тое, каб яны некаторы час не вырошчвалі свіней.

Як паведамлялася, па дадзеных BNS, ветслужба Літвы звярнулася ў Еўракамісію з просьбай выдзеліць краіне 13,5 млн еўра для барацьбы супраць АЧС. На ўзвядзенне плота ўздоўж мяжы з Беларуссю плануецца накіраваць 10 млн еўра. Таксама ў сувязі з рэгістрацыяй АЧС у Беларусі Літва плануе знішчыць на мяжы каля 10 тыс. свіней.