Леў Марголін: Падзенне расейскага ВУП ударыць па беларускім экспарце

Той факт, што беларускай эканоміцы пакуль яшчэ ўдаецца трымацца на плаву, - штучная з'ява.

Пра гэта сайту charter97.org эканаміст Леў Марголін, каментуючы падзенне ВУП Расеі.

«Не сакрэт, што беларуская эканоміка звязаная з расейскай вельмі цесна, і на той факт, што на нашых складах сабралася вялікая колькасць прадукцыі, паўплывала не толькі падзенне канкурэнтаздольнасці беларускіх тавараў, але і расейская рэцэсія, якая зніжае попыт на інвестыцыйныя тавары. Але казаць пра тое, як гэта адаб'ецца на аб'ёме ВУП Беларусі вельмі цяжка, таму што ў нас нельга моцна давяраць статыстычным дадзеным. Справа ў тым, што калі гаворка ідзе пра аб'ём валавога ўнутранага прадукту, то павінна рабіцца папраўка на інфляцыю, але як яна робіцца ў Беларусі, сказаць цяжка, таму што гэта таемная справа Статыстычнага камітэта. Ён можа сказаць, што ў нас за паўгода 1,5-2% росту, а на самой справе, з улікам інфляцыі яго можа і не быць», - адзначыў эксперт.

Ён падкрэсліў, што падзенне ВУП Расеі хваравіта і адчувальна адаб'ецца і ўжо адбіваецца на беларускім экспарце ў Расею.

«Калі эканоміка Расеі чхае, то ў беларускай тэмпература пад 40°C. Той факт, што ёй пакуль яшчэ ўдаецца трымацца на плаву - у сваёй большасці штучная з'ява, таму што калі прадукцыя не купляецца, то ва ўмовах нармальнай рынкавай эканомікі памяншаецца вытворчасць. Але ў нашай краіне ўсё наадварот: збыту няма, але аб'ёмы прадукцыі захоўваюцца. Больш за тое, кіраўнікам прадпрыемстваў пад пагрозай пакарання забараняецца зніжаць аб'ёмы выпуску прадукцыі», - дадаў эканаміст.

Ён лічыць, што ў такіх умовах беларуская эканоміка можа працягнуць сваё існаванне толькі з дапамогай крэдытаў.

«І гаворка ідзе не пра абавязкі, якія бярэ дзяржава, а пра ўнутраныя рублёвыя крэдыты. Цяпер яны вельмі дарагія. За паўгоддзе ўжо вычарпаны ліміт на тое, каб знізіць іх кошт за кошт бюджэту, але я думаю, што калі сітуацыя не зменіцца, то льготнае крэдытаванне за кошт бюджэту будзе працягвацца. Гэта адзіны выхад для захавання беларускіх прадпрыемстваў хоць бы ў тым стане, у якім яны знаходзяцца на дадзены момант», - сказаў на заканчэнне Леў Марголін.

Нагадаем, па дадзеных Расстата, рост расейскай эканомікі ў другім квартале 2013 года склаў усяго 1,2%.