Рабочыя звальняюцца з МТЗ

Склады прадпрыемства па-ранейшаму забітыя гатовай прадукцыяй.

Пра гэта сведчаць новыя фатаграфіі, якія былі перададзеныя рабочымі завода ў прафсаюз РЭП, піша сайт praca-by.info.

Рабочыя звальняюцца з прадпрыемства, не атрымаўшы абяцанай зарплаты, а кіраўніцтва працягвае сцвярджаць, што праблем з рэалізацыяй прадукцыі няма. Больш за тое, сайт МТЗ горда заяўляе, што «на працягу шэрагу гадоў завод захоўвае за сабой долю ў 8-10% ад сусветнага рынку колавых трактароў, знаходзячыся ў васьмёрцы найбуйнейшых сусветных вытворцаў».

Фотаздымкі тэрыторыі МТЗ, застаўленай непрададзенымі трактарамі, перадалі ў прафсаюз РЭП работнікі завода. На сустрэчы са старшынёй прафсаюза Генадзем Фядынічам яны распавялі пра тое, што шмат хто сыходзіць з завода, таму што заработная плата ў параўнанні з пачаткам года ўпала.

Генадзь Фядыніч адзначыў, што і ў метро вісяць аб'явы аб вакансіях на МТЗ, у пераліку пазначаныя больш за 15 спецыяльнасцяў. Ён лічыць, што гэта сведчыць пра вялікую цякучасць кадраў.

Каментуючы новыя фатаграфіі з трактарнага завода, прафсаюзны лідар выказаў здагадку, што задача, якую паставіў Лукашэнка, - за лета разгрузіць склады - апынулася непасільнай.

«Гэта сур'ёзная праблема. Павелічэнне ВУП за кошт выпуску вялікага аб'ёму прадукцыі, якую потым немагчыма рэалізаваць, выходзіць бокам, - лічыць прафсаюзны лідар. - Рабочыя распавялі нам, што кіраўніцтва змяніла палажэнне аб прэміраванні. Зараз прэміраванне залежыць ад рэалізацыі. Гэта несправядлівае рашэнне. Пры чым тут токар або фрэзероўшчык, якім было дадзенае зменнае заданне вытачыць пэўную колькасць дэталяў. Яны выканалі сваю працу і павінны за гэта атрымаць грошы».

На думку Генадзя Фядыніча, яшчэ адна праблема - замарожванне абаротных сродкаў.

«Мы яшчэ не ведаем, колькі трактароў перададзеныя сельгаспрадпрыемствам у лізінг. І хоць шмат якім калгасам не патрэбная была гэтая тэхніка, яны вымушаныя былі яе ўзяць і павінны разлічыцца сваёй прадукцыяй. Вось такая «эканоміка наадварот» атрымліваецца», - падсумаваў старшыня прафсаюза РЭП.

Паводле звестак Белстата, у першым паўгоддзі ў Беларусі выраблена 34,4 тыс. трактароў для сельскай і лясной гаспадаркі, што складае 90,4% да ўзроўню студзеня-чэрвеня мінулага года. Аб'ём складскіх запасаў трактароў на 1 ліпеня склаў 11,5 тыс. трактароў, або 200,3% да сярэднямесячнага аб'ёму вытворчасці.