Мясніковіч пахваліў Дворніка за «азартную» падрыхтоўку да «Дажынак»

Прэм'ер-міністр упэўнены, што ўсе планавыя аб'екты ў Жлобіне да рэспубліканскага свята працаўнікоў вёскі будуць уведзеныя ў эксплуатацыю ва ўстаноўленыя тэрміны.

Пра гэта ён заявіў журналістам падчас рабочай паездкі ў Магілёўскую і Гомельскую вобласці, піша БелТА.

Кіраўнік урада азнаёміўся з ходам падрыхтоўкі аб'ектаў да «Дажынак». «Работы яшчэ шмат, - сказаў Міхаіл Мясніковіч. - У Жлобіне пісьменна разгорнутыя працоўныя рэсурсы, адчуваецца ўздым, я б нават сказаў азарт ў працы».

Прэм'ер-міністр з пазітыўнага боку адзначыў працу губернатара Гомельскай вобласці Уладзіміра Дворніка, яго ўвагу да добраўпарадкавання не толькі абласнога цэнтра, але і іншых гарадоў, населеных пунктаў.

Міхаіл Мясніковіч падкрэсліў, што з'яўленне новых аб'ектаў у Жлобіне стане годным падарункам гараджанам.

«Жлобін прыгажэе на вачах», - рэзюмаваў прэм'ер-міністр.

Аб незадаволенасці жыхароў раённага цэнтра некаторымі аспектамі гэтага «ператварэння», таксама, як і пра наступствы аўральнай падрыхтоўкі да «Дажынак» у іншых гарадах прэм'ер-міністр маўчаў.

Нагадаем, у гэтым годзе першапачаткова планавалася правядзенне фестывалю працаўнікоў вёскі ў Гомелі, аднак праз карупцыйны скандал, да якога маюць дачыненне чыноўнікі абласнога цэнтра, яго перанеслі.

Уладзімір Дворнік раней заявіў, што на падрыхтоўку Жлобіна да «Дажынак», спатрэбіцца каля трыльёна рублёў.