FEMEN пакідае Украіну

Рух FEMEN спыняе дзейнасць ва Украіне пасля ператрусу і нападаў.

Рух FEMEN пастанавіў згарнуць сваю дзейнасць ва Украіне і пераехаць за мяжу. Пакінуць краіну дзяўчат прымусілі напады і сённяшні ператрус у кіеўскім офісе, паведамляе НТВ.

Аляксандра Шаўчэнка, актывістка FEMEN: «Мы зразумелі такі намёк і прынялі пастанову згарнуць дзейнасць ва Украіне. Мы хочам захаваць сваіх актывістаў і зберагчы іх ад нападаў. Мы баімся быць забітымі!»

Яна дадала, што толькі за апошні час на чальцоў руху было ўчынена пяць нападаў, а за мяжой FEMEN будзе спакайней, паведамляе НБН.

Сёння міліцыя падчас ператрусу ў офісе FEMEN знайшла пісталет, гранату, а таксама партрэты Уладзіміра Пуціна і патрыярха Кірыла з намаляванымі на іх тварах прыцэламі. У скандальнай арганізацыі паспяшаліся назваць усё, што адбываецца правакацыяй і запэўніць, што зброю ім падкінулі. У міліцыі ж заяву FEMEN разглядаюць як «глупства» і «поўнае трызненне», а таксама кажуць аб ананімным званку.

Адзначым, што ахвярамі нядаўніх нападаў сталі лідар FEMEN Ганна Гуцол, актывісткі Аляксандра Шаўчэнка, Яна Жданава, Аксана Шачко, а таксама ідэолаг руху Віктар Свяцкі.

Фота: femen.org