Нацыяналісты праводзяць зачысткі на рынках Масквы і Пецярбурга (Відэа)

У Маскве і Пецярбургу набіраюць папулярнасць акцыі рускіх праварадыкальных арганізацый па запалохванні прыезджых рынкавых гандляроў.

Нягледзячы на затрыманне 20 удзельнікаў першых такіх рэйдаў, якім зараз можа свяціць да сямі гадоў за «хуліганства», «рускія зачысткі», як іх назвалі ў СМІ, працягнуліся ў абодвух гарадах у мінулыя выходныя. Разам з тым Федэральная міграцыйная служба прапануе стварыць цэлую сетку спецустаноў для мігрантаў-нелегалаў, якія падлягаюць выдварэнню з тэрыторыі Расеі. Адпаведная ініцыятыва змяшчаецца ў падрыхтаваным ведамствам законапраекце. Журналісты кажуць пра ўзаемасувязь двух ініцыятыў.

У Маскве прадстаўнікі руху «Рускія» пад кіраўніцтвам Мікалая Бандарыка паспрабавалі зладзіць праверку дакументаў у латочнікаў каля станцыі метро «Водны стадыён». Акцыю хацелі сумясціць з ускладаннем кветак да памятнага крыжа на Кранштацкім бульвары, дзе ў снежні 2010 года ў бойцы з каўказцамі быў забіты футбольны фанат Ягор Свірыдаў, піша «Коммерсант».

АМАП абараніў рыначнікаў ад правакацый. Паўналетніх арганізатараў затрымалі, а іх больш юныя паслядоўнікі, страціўшы лідараў, разгубіліся і разышліся, піша NEWSru.com.

У Пецярбургу нацыяналісты ўсё ж такі змаглі праверыць некалькі гандлёвых кропак, прычым абышлося без затрыманняў. Актывісты прайшліся літаральна па ўсім горадзе, шукаючы гандляроў кавунамі і дынямі без расейскага грамадзянства і санітарных кніжак, перадае тэлеканал 100ТВ.

Яны як пакупнікі падыходзілі да гандляроў, пыталіся пра дакументы, якія дазваляюць гандаль у горадзе. Калі іх не было, то парушальнікаў перадавалі ў рукі супрацоўнікаў паліцыі, якія пільна назіралі за ходам шэсця.

Многія кропкі, на якія нацэліліся нацыяналісты, апынуліся проста кінутыя сваімі ўладальнікамі. З актывістамі ж быў папярэдне праведзены інструктаж: арганізатары пераканаўча прасілі іх не лаяцца матам і не займацца марадзёрствам, а дзейнічаць згодна з нормамі закона аб гандлі і абароне правоў спажыўцоў, перадае тэлеканал PiterTV.

Нацыяналісты не маюць намеру спыняцца на дасягнутым: ужо вырашаюць, дзе пройдуць новыя «зачысткі». У Пецярбургу да іх ужо пажадалі далучыцца казакі.

Барацьба праварадыкальных арганізацый з нелегальнай міграцыяй закранае не толькі рынкі: парушальнікаў адлоўліваюць, напрыклад, у падвалах жылых дамоў. Робяць гэта «рашуча настроеныя «актыўныя грамадзяне», якія нікім не кантралююцца», паведамляюць відавочцы.

Паход супраць нелегалаў, за якім сачыў журналіст выдання «Огонёк», арганізаваў рух «Шчыт Москвы», які мае больш за 3 тысяч падпісчыкаў «Вконтакте» і сувязі з «Адзінай Расеяй».

Рэйд праводзіўся ў доме, жыхары якога запэўніваюць, што два гады практычна беспаспяхова скардзіліся ў розныя інстанцыі на нелегальных мігрантаў, якія жывуць у падвале. У адрозненне ад паліцэйскіх, якія спасылаюцца на тое, што не маюць права ўзломваць дзверы (а на самой справе, як падазраюць жыхары, самі ж загадзя папярэджваюць каго трэба, каб паспелі павесіць на дзверы замок), «грамадзянскім актывістам» не робіць цяжкасці ўзламаць замкі мантыроўкай.

Па выніках рэйду ў памяшканнях падвалу было выяўлена сямёра мігрантаў, з якіх пад'ехала паліцыя адпусціла толькі аднаго. Астатніх забралі ў аддзяленне. За ўвесь час такіх акцый рух перадаў у АУС каля 250 мігрантаў. Большасць былі аштрафаваныя, а семярых дэпартавалі.

Падтрымка руху і такіх рэйдаў расце, ганарацца арганізатары. Журналісты ж асцерагаюцца, што ініцыятыва адкрывае прастору для самай рознай самадзейнасці і парушэння законаў у гэтым кірунку.