Аптэкам забаранілі прадаваць «Тэрафлю»
123- 11.09.2013, 10:57
- 105,271
Міністэрства аховы здароўя абавязала аптэкі купляць айчынны прэпарат «АРВІколд» замест імпартнага «Тэрафлю».
Беларускія аптэкі павінны купляць айчынны прэпарат «АРВІколд», а не захапляцца масавымі закупкамі імпартнага прэпарата «Тэрафлю», лічыць Міністэрства аховы здароўя Беларусі.
Напярэдадні эпідэміялагічнага перыяду, калі павышаным попытам карыстаюцца супрацьпрастудныя сродкі, Міністэрства аховы здароўя Беларусі разаслала інфармацыйны ліст, у якім абавязала ўсе аптэкі зрабіць закупкі айчыннага прэпарата «АРВІколд», які з'яўляецца аналагам вядомага імпартнага сродку «Тэрафлю», піша «Ежедневник».
Як сказана ў лісце, на складах айчыннага вытворцы СТАА «Лекфарм» маецца лекавы сродак для прафілактыкі і лячэння сезонных рэспіраторных інфекцый «АРВІколд», які ўяўляе сабой парашок для прыгатавання раствора для прыёму ўнутр.
«Лекавы сродак «АРВІколд» аказвае гарачкапаніжальнае, супрацьзапаленчае, супрацьацёкавае, абязбольвальнае і анцігістаміннае дзеянне», - гаворыцца ў лісце Міністэрства аховы здароўя.
«У параўнанні з замежным сінонімам (лекавы сродак «Тэрафлю Экстра») айчынны лекавы сродак «АРВІколд» мае кошт, даступны для шырокіх слаёў насельніцтва.
Асабліва звяртаем вашу ўвагу на тое, што дадзены лекавы сродак уключаны ў раздзел III пераліку лекавых сродкаў беларускай (расейскай) вытворчасці, абавязковых для наяўнасці ў аптэках усіх формаў уласнасці», - паведамляе Міністэрства аховы здароўя .