Беларускі прапаршчык змагаецца за права патрапіць у «ВІА Гру»
47- 11.09.2013, 21:16
- 74,526
Беларуска Алена Бярэзіна, якая служыць у рангу прапаршчыка ў МНС, прайшла ў фінал конкурсу «Хачу ў ВІА Гру».
Гэта праект, пасля якога павінен з'явіцца новы склад аднайменнага гурта.
«Наша Ніва» папрасіла яе распавесці, як калегі ставяцца да яе поспеху ў конкурсе.
- Выдатна ставяцца, - распавяла Алена Бярэзіна. - Рэч ў тым, што я даўно ўдзельнічаю ва ўсіх магчымых кастынгах і шоў. Мабыць, гэта асаблівасць майго характару. А «ВІА Гра» - гэта мая мара з дзяцінства, мне заўсёды хацелася папрацаваць разам з Канстанцінам Меладзэ. Гэта легендарны праект: усе дзяўчыны мараць патрапіць туды.
Вось і я, калі была яшчэ маленькай дзяўчынкай, хацела стаць адной з дзяўчат у групе «ВІА Гра». А тут лёс сам працягвае мне гэты шанец на далоні.
- І вы дасягнулі на конкурсе пэўных поспехаў?
- Я ў фінале! На жаль, не магу расказаць усіх драбніцаў - гэта ўмова кантракту. Аднак нас цяпер 23 дзяўчыны. Павінна быць 24, аднак удзельніца з Грузіі паехала на «Міс Сусвету». Цяпер нас рыхтуе сам Меладзэ, мы жывем у «Зорным доме». З намі працуе Алан Бадаеў уласнай персонай! Цяпер нас падзялілі на восем груп, па тры дзяўчыны ў кожнай. Фармаваў іх сам Меладзэ. Мы спаборнічаем ў тройках.
- Калі верыць сацыяльным сеткам, вы працуеце ў МНС. Як вашыя калегі паставіліся да ўдзелу ў конкурсе?
- Так, я працую салісткай-вакалісткай у аркестры МНС. Я вам скажу, што ў МНС служаць мужчыны з вялікай літары. Хто ж яшчэ пойдзе тушыць пажары, рызыкаваць жыццём - толькі сапраўдныя мужчыны.
Хіба можа ім не падабацца такі легендарны праект як «ВІА Гра»? Там прыгожыя, маладыя, таленавітыя дзяўчыны.
Таму мае калегі цалкам падтрымліваюць мяне ва ўсім, што звязана з «ВІА Гра». Вось калі б гурт ім не падабаўся - тут бы ўжо ўзнікалі пытанні.