Штэфан Фюле: У ЕЗ няма выбару, акрамя як працягнуць санкцыі

Еўрапарламент на сесіі ў Страсбургу абмеркаваў даклад аб сітуацыі ў Беларусі.

Дакумент падрыхтаваны дакладчыкам Еўрапарламента па Беларусі Юстасам Палецкісам (Літва) для Еўракамісіі, вярхоўнага прадстаўніка ЕЗ па знешняй палітыцы і палітыцы бяспекі, Рады ЕЗ і дзяржаў-членаў Еўразвяза, перадае БелаПАН.

Прадстаўляючы даклад, Палецкіс адзначыў, што сітуацыя з правамі чалавека ў Беларусі працягвае заставацца складанай. У той жа час ён падкрэсліў, што старшынства Літвы ў ЕЗ і саміт Усходняга партнёрства, які пройдзе ў Вільні ў лістападзе, неабходна выкарыстоўваць для паляпшэння адносінаў з Менскам і аднаўлення палітычнага дыялогу. «Зразумела, гэта магчыма толькі пры ўмове, што будуць вызваленыя ўсе палітвязні», - сказаў Палецкіс.

Еўракамісар па пытаннях пашырэння і добрасуседства Штэфан Фюле, які выступаў ад імя вярхоўнага прадстаўніка ЕЗ па пытаннях знешняй палітыкі і палітыкі бяспекі, адзначыў, што выкладзеныя ў дакладзе рэкамендацыі «дапамогуць у вырашэнні пытання, як вырашыць складаную сітуацыю ў краіне-суседцы».

Ён адзначыў, што ЕЗ гатовы паўнавартасна супрацоўнічаць з Менскам, але толькі пры ўмове, што «ўсе палітычныя зняволеныя будуць вызваленыя і рэабілітаваныя, а Беларусь прадэманструе прагрэс у сферы выканання правоў чалавека».

«Даклад жа кажа, што сітуацыя пакуль не мяняецца, - сказаў Фюле. - Сямёра палітвязняў па-ранейшаму знаходзяцца ў турме. Мараторый на смяротнае пакаранне ўсё яшчэ не ўведзены. Працягваецца пераслед актывістаў грамадзянскай супольнасці і крытыкаў улады».

У сувязі з гэтым, падкрэсліў еўракамісар, у ЕЗ няма выбару, акрамя як працягнуць у адносінах да Беларусі палітыку абмежавальных мер, да перагляду якіх Рада ЕЗ вернецца ў кастрычніку гэтага года.

У той жа час Фюле адзначыў, што пасля прызначэння неўязнога Уладзіміра Макея міністрам замежных спраў ўладамі Беларусі быў зроблены шэраг крокаў для наладжвання адносінаў з ЕЗ, у тым ліку Менск пагадзіўся на аднаўленне працы ў краіне амбасады Швецыі.

«Мы гэта вітаем, - сказаў Фюле. - Але выклікае шкадаванне, напрыклад, тое, што ўжо на працягу двух гадоў няма адказу на нашу прапанову пачаць перамовы аб палягчэнні візавага рэжыму паміж ЕЗ і Беларуссю».

Дэпутаты Еўрапарламента таксама асабліва падкрэслілі, што абавязковай умовай для аднаўлення дыялогу з афіцыйным Менскам з'яўляецца вызваленне ўсіх палітвязняў.

Як паведаміў па выніках абмеркавання Юстас Палецкіс, галасаванне па дакладзе адбудзецца 12 верасня.

Па словах Палецкіса, ён задаволены тым, як прайшло абмеркаванне дакумента ў Еўрапарламенце. Ён адзначыў, што пасля адабрэння даклад будзе накіраваны ў Еўракамісію, вярхоўнаму прадстаўніку ЕЗ па знешняй палітыцы і палітыцы бяспекі, Радзе ЕЗ і дзяржавам-членам Еўразвяза.