Volkswagen правёў 20 гадоў на штрафпляцоўцы ў Берасці

Адміністрацыя штрафной стаянкі выплаціць кампенсацыю ўладальніку аўтамабіля.

Аўташкола звярнулася ў суд з пазовам да яго, патлумачыўшы, што паводле дамовы з УУС яна на сваіх плошчах будзе захоўваць арыштаваныя аўтамабілі. Сярод іх стаяў на пляцоўцы з 2007 года аўтамабіль Volkswagen Polo, піша «Вячэрні Брэст».

Аўташкола хацела спагнаць з ўладальніка кошт утрымання аўтамабіля на сваіх плошчах. Суд пачаў вывучаць матэрыялы і знайшоў нямала фактаў, якія не маглі не здзівіць.

Перадгісторыя такая. Нехта Васін у ноч на 1 траўня 1993 года зрабіў падкоп пад невялікі магазін, з падкопу ўзламаў падлогу і выкраў тавар на вялікую суму - 2 мільёны рублёў (тады пачак цыгарэт каштаваў 108 рублёў). Злодзеям спатрэбілася дзве машыны, каб усе вывезці. Адну аўтамашыну - ВАЗ - неўзабаве ўдалося апазнаць. Васіна затрымалі, але пра змоўшчыка ён маўчаў. Работнікі вышуку падазравалі, што другі аўтамабіль - Volkswagen Polo. Аўтамабіль узялі пад ахову. А вось гаспадар схаваўся. Легкавушкі прызналі прыладай злачынства і пакінулі на захоўванні ў органах міліцыі.

Спачатку нікога не засмуціла, што ў аўтамабілі эксперты не знайшлі слядоў і часцінак выкрадзеных у краме тавараў. У выніку ў траўні 2007 года мужчыну перасталі лічыць падазраваным. Крымінальная справа была спыненая. Тады ж Volkswagen Polo перамясцілі з міліцэйскай штрафпляцоўкі на пляцоўку аўташколы. Прыкладна праз год следчы пастанавіў аўтамабіль выключыць са стаянкі. Верагодна, «выключыць» азначала вярнуць уладальніку, але ён так і не з'явіўся ў Берасці. А ў жніўні гэтага года аўташкола падала да ўладальніка аўтамабіля пазоў, у якім запатрабавала аплаціць кошт захоўвання аўтамабіля на штрафпляцоўцы ў перыяд з 1 ліпеня 2010 па 30 чэрвеня 2011-га.

У справе ёсць дзіўны дакумент. Гэта распіска, якую ўладальнік даў следчаму. Распіска нікім не завераная, датаваная красавіком 2008 года. У ёй сказана, што ён атрымаў ад следчага аўтамабіль які належыць яму, і прэтэнзій да міліцыі не мае. А тут - пазоў на тры з лішнім мільёны рублёў плюс судовыя выдаткі. Таямнічы ўладальнік не прыйшоў і на гэты працэс. Яго інтарэсы прадстаўляў адвакат. Ён не прызнаў пазоў аўташколы і высунуў сустрэчнае патрабаванне: аб спагнанні з аўташколы на карысць уладальніка машыны мільёна рублёў на пакрыццё расходаў на аказанне юрыдычнай дапамогі адваката.

Суд Ленінскага раёна Берасця прызнаў, што патрабаванне аўташколы з'яўляецца неабгрунтаваным, так як да гэтага часу, паводле дакументаў, аўтамабіль даўно павінен быў быць вернуты ўладальніку. А вось патрабаванні прадстаўніка адказчыка падлягаюць задавальненню ў поўным аб'ёме.