Эканомная Харватыя адмовілася ад удзелу ў «Еўрабачанні-2014»
12- 20.09.2013, 10:49
- 10,824
Прапусціць наступны конкурс еўрапесні Харватыя вырашыла з-за крызісу, а таксама нізкіх вынікаў мінулых гадоў.
Конкурс «Еўрабачанне-2014» пазбавіўся Харватыі. Гэтая краіна вырашыла адмовіцца ад удзелу ў наступным годзе з-за цяжкай эканамічнай сітуацыі, гаворыцца ў заяве тэлерадыёкампаніі HRT, якая займаецца адборам выканаўцаў на агляд еўрапесні, паведамляе НТВ.
Адной з прычын такога рашэння ў HRT называюць цяжкую эканамічную сітуацыю ў краіне, бо падрыхтоўка і ўдзел у конкурсе ўлятаюць падаткаплатнікам у капейчыну. А не самыя паспяховыя вынікі харвацкіх выканаўцаў у апошнія гады і грамадская крытыка з гэтай нагоды з'яўляюцца ў гэтай сітуацыі дадатковымі фактарамі.
Тэлерадыёкампанія, магчыма, нават не будзе трансляваць «Еўрабачанне-2014» у прамым эфіры. Гэтае пытанне яшчэ будзе абмяркоўвацца з гледачамі.
Наступнае «Еўрабачанне» прыме дацкі Капенгаген. У 2013 годзе конкурс выйграла юная Эмілі дэ Форэст.